Мувофиқи пешгӯии ҳавошиносон то 20 май дар миқёси ҷумҳурӣ ҳавои ноустувор боқӣ хоҳад монд.
Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон низ ба иттилои аҳолии ҷумҳурӣ мерасонад, ки то 20 май дар миқёси ҷумҳурӣ тағйирёбии вазъи обу ҳаво дар назар дошта шуда, боришоти борони кӯтоҳмуддати шадид, ба амал омадани раъду барқ, дар доманакӯҳҳо омадани сел, баландшавии сатҳи оби дарёҳо, сангрезӣ ва фаромадани ярч дар назар дошта шудааст.
Бинобар ин аз шаҳрвандони ҷумҳурӣ ва меҳмонон хоҳиш карда мешавад, ки дар ин давра аз рўи имконият аз сафар кардан тавассути мавзеъҳои осебпазир ва минтақаҳои хавфнок худдорӣ намоянд.
Инчунин кумита аз шаҳрвандон хоҳиш менамояд, ки дар ин давра дар вақти гузаронидани кишт, корҳои хоҷагии қишлоқ ва нигоҳ доштани ҳайвоноти хонагӣ дар чарогоҳҳо эҳтиёткор бошанд.
Хамчунин манбаъ гуфт, аз 11 май то имрӯз кормандони Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон дар ҷамоатҳои Зайнабобод, Тоҷикобод, Адолат, Комсомол, Садоқати ноҳияи Рӯдакӣ, ки аз омадани сел зарар дида буданд, амалиёти наҷотдиҳӣ ва барқарорсозӣ гузарониданд.
Дар як муддати кӯтоҳ бо қувва ва воситаҳои Кумита аз ҳисоби сарбозони қисми низомии Кумита, наҷотдиҳандагон ва бригадаҳои сӯхторнишонии Вазорати корҳои дохилӣ ва сарбозони Вазорати мудофиа барои корҳои наҷотдиҳӣ ҷалб карда шуданд.
Ҳамарӯза дар мавзеи офатдида ҷаласаҳои Ситод оид ба бартараф намудани офати табиӣ баргузор мешаванд. Ҳоло Комиссияи махсус оид ба муайян намудани зарар ба хонаҳои мардум ва заминҳои кишт дар натиҷаи офати табиӣ ташкил шудааст.
Аз тарафи кумита айни замон 6 гурӯҳ ташкил шуд, ки онҳо барои бартараф кардани оқибатҳои офати табиӣ машғул мебошанд. Ин гурӯҳҳо аз тарафи Кумита бо ҷалби кормандони ВКД, Вазорати мудофиа, ҳокимияти иҷроияи мақомоти давлатии ноҳия, инчунин худи аҳолӣ ташкил шудаанд
Ба аҳолии зарардида аз ҷониби Ҳукумати Ҷумҳурии Тоҷикистон ва бо дастгирии аъзои РЕКАТ- ( гурӯҳи ҳамоҳангсозӣ ва фаврӣ дар ҳолатҳои фавқулода барои бартараф намудани он) кумак расонида мешавад.
Дар минтақаи офати табиӣ, аз ҳисоби кормандони Кумита навбатдории шабонарӯзӣ ташкил шуда, захираҳои фаврӣ омода шудаанд.
Айни замон барои зарардидагон масъалаи таъминот бо ғизо, оби нўшокӣ, доруворӣ ва пойафзол ҳал шуд.
Назорати ҷараёни ҳодисаҳои табиӣ дар ноҳияҳо зери назорати доимии роҳбарияти Кумита қарор дорад.
Манбаъ: http://khovar.tj/
Нет комментариев