Варзишгари шӯҳратёри тоҷик дар риштаи бокс Мавзуна Чориева дар даври аввали Чемпионати ҷаҳон оид ба ин намуди варзиш, ки дар шаҳри Остонаи Қазоқистон ҷараён дорад, аввалин ҳарифи худ Вен-Линг Ченро аз Тайван бо бартарии 3 : 0 ба мағлубият дучор кард.
Барандаи медали биринҷии Бозиҳои олимпии соли 2012 дар Лондон Мавзуна Чориева дар вазни 60 кг ният дорад дар охирин мусобиқае, ки роҳхат-литсензияро ба Бозиҳои тобистонаи олимпии Рио-де-Жанейро-2016 медиҳад, ба пирӯзӣ комёб шавад. Рақиби навбатии муштзани тоҷик Яна Алексеевна аз Озарбойҷон мебошад, ки шоми 21 май бо ҳам вориди майдон мешаванд. Дар ин вазн 47 нафар муддаиён барои медалҳо мубориза мебаранд.
Аммо, намояндаи дигари кишварамон Шоира Зулқайнарова дар вохӯрии нахустинаш дар вазни 75 кг аз Сараҳ Шеурих аз Олмон ба нокомӣ дучор шуд ва ҳуқуқи идома додани мусобиқаро аз даст дод. Охирин имконияти ба даст овардани роҳхат ба бозиҳои олимпии Рио-2016 барои Шоира аз даст рафт.
Хотиррасон менамоем, ки дар Чемпионати ҷаҳон 285 варзишгар аз 65 давлат иштирок доранд ва он то 27-уми май идома меёбад.
Мавзуна Чориева – 1-уми октябри соли 1992 дар шаҳри Кӯлоби Ҷумҳурии Тоҷикистон ба дунё омадааст. Аз овони хурдсолӣ варзишро хеле дӯст медошт ва пайваста дар мусобиқаҳои варзишӣ иштирок мекард.
Ӯ варзишгар ва нахустин муштзани тоҷик аст, ки бори нахуст дар Тоҷикистон унвони Қаҳрамони муштзани Осиёро дарёфт кард.
Соли 2012 М.Чориева барандаи медали биринҷии Бозиҳои олимпӣ дар Лондон гардид. Барои чунин комёбиву муваффақияташ ӯ 6-уми сентябри соли 2012 аз ҷониби Пешвои миллат, Президенти Ҷумҳурии Тоҷикистон, мӯҳтарам Эмомалӣ Раҳмон бо Ордени «Шараф» дараҷаи 2 ва мукофоти пулӣ ба андозаи 200 ҳазор сомонӣ сарфароз гардонида шуд.
Мавзуна Чориева нахустин зани тоҷик мебошад, ки дар намуди бокс чун муштзани ғолиб ва дорандаи медали олимпӣ дар таърихи Тоҷикистон сабти ном гардид.
Ҳамчунин, вай дар Чемпионати ҷаҳон оид ба бокс дар Хитой дар соли 2012-ум медали биринҷӣ ба даст овард. Худи ҳамон сол дар Чемпионати Осиё дар Монголия соҳиби медали нуқра ва дар Бозиҳои олимпӣ соҳиби медали биринҷӣ гардида буд.
Пас аз чунин баромаду ғолибиятҳо Мавзуна Чориева дар Тоҷикистон чун қаҳрамон истиқбол ва эътироф гардид. Президенти кишвар барояш ордени «Шараф» дараҷаи II, Раиси шаҳри Душанбе ҳуҷраи 3-хонагӣ, Ҳукумати Кӯлоб – ҳуҷраи 5-хонагӣ тақдим намуданд. Ҳамзамон, бо мукофотҳои пулии мухталиф Мақомоти иҷроияи ҳокимияти давлатии вилоятҳои Суғд ва Хатлон ӯро сарфароз гардониданд.
Дар моҳи октябри соли 2012 М.Чориева ба шавҳар баромад ва овозае ҳам паҳн шуд, ки гӯё ӯ аз соҳаи варзиш ба пуррагӣ меравад. Аммо Мавзуна дар як сӯҳбате гуфта буд, ки муваққатан машқро қатъ менамояд.
Шавҳараш Амон Бобоев, хатмкардаи факултети менеҷмент ва маркетинги Донишгоҳи давлатии Кӯлоб мебошад. Мавзуна дар ҳамон сол гуфта буд: «Ман дар ҳақиқат варзишро дӯст медорам, вале бароям оила муҳимтар аст. Тахминан барои як сол варзишро тарк мекунам, зеро нияти фарзандор шудан дорам. Шавҳарам ва оилаи ӯ зид нестанд, ки ман бо варзиш машғул шавам. Аммо ман зарур донистам, ки бо варзиш танҳо пас аз фарзандор шуданам боз шуғл ҳоҳам варзид».
Худи варзишгар ваъда дода буд, ки барои Тоҷикистон аз Бозиҳои олимпии минбаъда медали тиллоро меоварад, бахусус соли 2016-ум аз Бразилия.
Алҳол Мавзуна ва шавҳараш Амон соҳиби як фарзанд — духтараки донояку зебояканд ва хушбахтона умр ба сар мебаранд.
Мураббӣ, яъне тренери Мавзуна – Мирзо Шамсиев гуфт, тамоми маҳорату малака, истеъдоду кӯшишашро бар он равона менамояд, то Мавзуна дар Чемпионати ҷаҳон оид ба ин намуди бокс, ки дар шаҳри Остонаи Қазоқистон то 27-уми май идома меёбад, ғолиб барояд ва барои иштирок дар Бозиҳои тобистонаи олимпии XXXI дар Рио-де-Жанейрои Бразилия роҳхат гирад.
Мо низ ба ин умед дорем ва барои Мавзуна Чориева комёбиву муваффақият таманно менамоем!
Исломҷон Бобоев
Нет комментариев