Аз ҷониби мутахассисони Агентии стандартизатсия, метрология ва нозироти савдои назди Ҳукумати Ҷумҳурии Тоҷикистон — «Тоҷикстандарт» беш аз 7 ҳазор бозичаҳои ба талаботи санадҳои меъёрию ҳуқуқӣ ҷавобгӯ набуда ва ба саломатӣ зараррасон ошкор ва мусодира гардиданд.
Аз маркази матбуоти «Тоҷикстандарт» ба АМИТ «Ховар» хабар доданд, ки ҷиҳати ҳимояи бозори истеъмолӣ аз воридоти молҳои пастсифат ва хатарнок нозирони савдои Агентӣ мунтазам дар бозорҳо ва нуқтаҳои савдо санҷиш гузаронида, молҳои пастсифату бесифат ва ба талаботи санадҳои меъёрию техникӣ ҷавобгӯ набударо ошкор ва мусодира менамоянд.
«Беш аз 7 ҳазор бозичаи аз тариқи қочоқ ба қаламрави кишвар воридшуда ошкор ва мусодида шуда, барои нобудсозӣ пешниҳод шудааст. Нисбат ба воридкунандагон ва соҳибкороне, ки ин бозичаҳоро ба бозор баровардаанд, тибқи Кодекси ҳуқуқвайронкунии маъмурӣ тадбирҳои мушаххас андешида шуданд», — тазаккур доданд дар «Тоҷикстандарт».
Маврид ба зикр аст, ки чунин бозичаҳои зараровар ба саломатии кӯдакон хатар дорад. Аз ин рӯ, мутахассисони соҳа муътақид бар онанд, ки истеҳсоли бозичаҳои кӯдакона бояд дар дохили кишвар ба роҳ монда шавад, то ки зери назорати доимии мутахассисони соҳа қарор гирад.
Дар воқеъ, Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон бо мақсади татбиқи вазифаҳои стратегии мамлакат дар самти таъмини риояи талаботи ҳуҷҷатҳои меъёрӣ-техникӣ, меъёрҳои метрологӣ, ҳифзи бозори истеъмолӣ ва ҳимояи ҳуқуқи истеъмолкунандагон дар чор моҳи соли 2016 корҳои муайянеро ба сомон расонид.
Дар ин маврид яке аз вазифаҳои асосӣ мутобиқкунии ҲМТ бо стандартҳои байналмилалӣ ва минтақавӣ ва тайёркунии чунин меъёргузории техникӣ ва стандартонӣ мебошад, ки заминаашон талаботҳои Ташкилоти Байналмилалии Савдо доир ба монеаи техникӣ дар савдо бошанд.
Ҷанбаҳои асосии стандартонӣ дар Ҷумҳурии Тоҷикистон ба бехатарӣ, ҳифзи муҳити зист, ягонагии ченак, таъмини сифат, мутобиқати техникию иттилоотӣ ва ғайра равона карда шудаанд.
Дар Ҷумҳурии Тоҷикистон сертификатсия бо мақсади ҳифзи манфиатҳои истеъмолкунандагону истифодабарандагон дар масъалаҳои бехатарии маҳсулот барои ҳаёт, саломатӣ ва амвол, ҳифзи муҳити зист, сифати маҳсулот ва ғайра амалӣ карда мешавад. Муносибат дар соҳаи сертификатсия ва тасдиқи ҳатмии мутобиқати маҳсулот ва хизматрасониҳо ба талаботҳои меъёрӣ тибқи Қонуни Ҷумҳурии Тоҷикистон “Дар бораи сертификатсияи маҳсулот ва хизматрасониҳо” ва санадҳои қонунгузории дар асоси он баровардашавандаи Ҷумҳурии Тоҷикистон ба танзим дароварда мешавад.
Метавон гуфт, ки кормандони Агентии стандартизатсия, метрология ва нозироти савдои назди Ҳукумати Ҷумҳурии Тоҷикистон — «Тоҷикстандарт» бозорҳои кишварро аз молу маҳсулоти пастсифат, мӯҳлати истифодабариашон гузашта ва пеш аз ҳама зараррасон ҳифз намуда, бо ин восита саломатиии шаҳрвандонро нигоҳ медоранд.
Ҳамин тариқ, ошкоркунӣ ва мусодираи беш аз 7 ҳазор бозичаи ба саломатӣ зараррасон ба кормандони «Тоҷикстандарт» даст дод. Бо ин васила онҳо тавонистанд 7 ҳазор кӯдаку бачагонро аз бемориву маризӣ эмин доранд.
Ин тӯҳфаи хуби «Тоҷикстандарт» барои кӯдакон дар арафаи Рӯзи байналмилалии муҳофизати кӯдакон, ки ҳар сол 1-уми июн таҷлил карда мешавад, ба ҳисоб меравад.
Нет комментариев