Дар Рӯзи байналмилалии кӯдакон, ки ҳамсола санаи 1 июн қайд мегардад, чорабинии пуршукӯҳ доир хоҳад шуд.
Чорабинии маракзӣ дар Маҷмаи фарҳангию таърихии «Қалъаи Хуҷанд» баргузор мешавад. Тибқи нақшаи Мақомоти иҷроияи ҳокимияти давлатии вилояти Суғд 1 июн дар Маҷмаа намоиши маҳсулоти ҳунарҳои халқии аз ҷониби кӯдакону наврасон омода гашта, барномаи консертии ҳунармандони ҷавон баргузор гашта, бо қувваи табиатдӯстони ҷавон «Гӯшаи зинда» -и парранадаҳо, моҳиҳо ва дигар ҳайвонот ташкил карда мешавад.
Масъулини чорабинӣ ният доранд бо мақсади ташаккули завқи зебоипарастии кӯдакону наврасон озмунҳои гуногунро доир намоянд. Дар рафти чорабинӣ барои ҳозирон барномаи консертии истеъдодҳои ҷавон пешкаш хоҳад шуд.
Ҷоиз ба зикр аст, ки ба чорабинии идона намояндагони кӯдакону наврасони тамоми шаҳру ноҳияҳои вилоят, ятимони кулл, тарбиятгирандагони мактаб-интернатҳо ҷалб мешаванд.
Дар ин бора аз Хадамоти матбуоти Раиси вилояти Суғд хабар доданд
Нет комментариев