Имрӯз дар сартосари ҷаҳон Рӯзи байналмилалии ҳифзи кӯдакон ҷашн гирифта мешавад. Бино ба иттилои Вазорати меҳнат ва ҳифзи иҷтимоии аҳолии Ҷумҳурии Тоҷикистон айни замон дар миёни аҳолии беш аз 8 миллионнафараи Тоҷикистон беш аз 3 миллион нафарро кӯдакон ташкил медиҳанд. Аз ин теъдод, 30 ҳазор кӯдакон дорои имкониятҳои маҳдуд мебошанд.
Бояд гуфт, ки Рӯзи ҳифзи кӯдакон аз 1-уми июни соли 1950 инҷониб қайд карда мешавад. Вале, ҳанӯз соли 1925 дар анҷумани ҷаҳонии вазъи кӯдак дар Женева, 1-уми июн ҳамчун Рӯзи кӯдак муқаррар шуда буд. Аммо, баъзе кишварҳо 20-уми ноябр — Рӯзи тасвиби Эъломияи ҳуқуқи кӯдак ва паймони байналмилалии ҳуқуқи кӯдакро ҳамчун Рӯзи умумии кӯдакон ҷашн мегиранд.
Дар Ҷумҳурии Тоҷикистон чун дар дигар кишварҳо, ҳамасола рӯзи аввали фасли тобистон – 1-уми июн ҳамчун Рўзи байналмилалии ҳифзи кўдакон таҷлил карда мешавад. Федератсияи байналмилалии занон бо баргузории ҷаласаи махсус моҳи ноябри соли 1949 Рўзи ҳифзи кўдаконро муайян намуда, ба хотири ҳимояи ҳуқуқ, ҳаёт ва саломатии кўдакон бо дастгирии Созмони Милали Муттаҳид 1-уми июни соли 1950 ҳамчун Рўзи байналмилалии ҳифзи кўдакон дар тамоми ҷаҳон эълон гашт.
Ин рӯз ҳамасола дар кишвари мо низ бо шукӯҳу шаҳомати хоса ва хеле хотирмон ҷашн гирифта мешавад. Мақсад аз эълони ин рӯз зиндагии хуш ва ояндаи неки насли наврас мебошад. Бахшида ба ин сана дар кишвар чорабиниҳои зиёди маърифатӣ ва фарҳангию фароғатӣ, маҳфилҳои ҷолиби кӯдакона, консерти идонаву бозиҳои гуногуни варзишӣ баргузор мегарданд.
Бояд қайд намуд, ки дар тамоми дунё ба масъалаи тарзи ҳаётгузаронии кӯдак, ба таври зарурӣ таъмин будани ӯ аз ҷиҳати молиявӣ, фаро гирифта шудани кӯдакон ба таълиму тарбия ва ғамхорӣ ба онҳо, хамчун ба пояи асоси ояндасози миллат, аҳамияти ҷиддӣ дода мешавад. Ҳамзамон, баҳри ҳимояи ҳуқуқи кӯдакони ҷаҳон Конвенсия дар бораи ҳуқуқҳои кўдак амал мекунад, ки аз ҷониби Созмони Милали Муттаҳид қабул гардида буд.
Конвенсия дар бораи ҳуқуқи кўдак воситаи асосиии байналмилалие ба шумор меравад, ки дар он тамоми ҳуқуқи кўдакон дарҷ гардидаанд. Конвенсияи мазкур аз ҷониби Ассамблеяи Генералии Созмони Милали Муттаҳид дар таърихи 20-уми ноябри соли 1989 қабул гардидааст ва қариб дар тамоми давлатҳои дунё ба тасвиб расидааст ва ин гувоҳӣ медиҳад, ки ҷомеаи ҷаҳонӣ ба масъалаҳои кўдакон аҳамияти ҷиддӣ медиҳанд.
Ҷумҳурии Тоҷикистон Конвенсия дар бораи ҳуқуқҳои кўдакро соли 1993 ба тасвиб расонд ва ўҳдадориҳоро барои амалӣ намудани принсипҳои дар Конвенсия қайдшуда ба зимма гирифт. Конвенсия дар бораи ҳуқуқҳои кўдак яке аз аввалин конвенсияҳое мебошад, ки Тоҷикистон баъди ба даст овардани истиқлолияти давлатӣ ба тасвиб расонд ва ўҳдадориҳои ҳақиқии худро барои насли наврасу ҷавонон ҳамчун ояндаи дурахшони кишвар нишон дод. Тибқи Конвенсия дар бораи ҳуқуқҳои кўдак, ҳар як шахси аз 18 сола хурд, кўдак ба шумор меравад. Бештар аз 30 дар сади аҳолии Ҷумҳурии Тоҷикистонро кўдакон ташкил медиҳанд ва онҳо барои ҷумҳурӣ захираҳои хеле муҳим ба ҳисоб мераванд, бинобар ин давлат барои муҳайё намудани шароитҳои беҳтарин барои кўдакон саъю талошҳои зиёдеро ба харҷ медиҳад.
Дар ҳақиқат, кӯдакон пули устуворе мебошанд, ки имрӯзро бо фардо мепайванданд. Ҷомеа ва афроде, ки дар андешаи ояндаи дурахшонанд, пеш аз ҳама нисбат ба кӯдакон ғамхорӣ зоҳир намуда, тамоми саъю кӯшиши худро ба он равона месозанд, ки бачаҳо ҳаматарафа солим ба воя бирасанд ва фардо фарзандони номдору номовару номбардори Ватан гарданд. Фарзанд меваи умри инсон, меваи дарахти ҳаёт, маънии зиндагӣ ва давоми зиндагии шахс аст. Мутаассифона, ҳастанд афроде, ки ба қадри ин неъмати бебаҳои Яздони пок нарасида, аз баҳри кӯдакону бачагонашон мегузаранд ё бо баҳонаи душвории зиндагӣ тифлаконашонро ба «Хонаи бачаҳо» супурда, бо ҳамин гӯё «қарз»-и падарӣ ва модарии худро адо мекунанд.
Худ қазовавт кунед, модоме, ки кӯдак бе меҳру муҳаббати волидайн ба воя мерасад, чӣ гуна метавонад, нисбат ба атрофиён, нисбат ба халқу миллат ва Ватани хеш муҳаббат дошта бошад?
Ё худ таълими бе тарбия асар надорад, бинобар ин бештар барои бой ва пурғановат гаштани дунёи маънавию вусъати ҷаҳонбинии бачаҳо бояд кӯшиш намоем. Кӯдакон бояд ба варзиш машғул шаванд, шеър азбар кунанд, ба сайру саёҳат раванд.
Чанд дақиқа қабл, аз Хадамоти матбуоти Раиси вилояти Суғд хабар доданд, ки имрӯз, 1-уми июн дар Маҷмааи фарҳангию таърихии «Қалъаи Хуҷанд» бахшида ба Рӯзи байналмилалии ҳифзи кӯдакон бо ҳузури беш аз 3 ҳазор нафар кӯдакону наврасон аз шаҳру ноҳияҳои вилояти Суғд чорабинии бузурги идона баргузор шуд.
Раиси вилояти Суғд Абдураҳмон Қодирӣ барои табрики насли наврас, ки ояндаи миллат аз онҳо вобастагии калон дорад, ба ин макони зебо ва дилрабову дилфиреб омад.
Ӯ нахуст аз гӯшаҳои гуногуне, ки дар растаҳои гулпӯши Маҷмаа ташкил шуда буданд, дидан намуд ва бо маҳсули дасти кӯдакону наврасон шинос гардид. Зимни шиносоиҳо ба ғолибони як қатор озмунҳо ва ба беш аз 500 нафар кӯдакону наврасоне, ки дар гӯшаҳои гуногун меҳмононро бо қироати шеъру таронаҳо дар васфи Ватан, Тоҷикистон, Пешвои миллат, Истиқлолият ва пешниҳоди саҳначаҳои ҷолиби диққат дар мавзӯъҳои гуногун истиқбол гирифтанд, тӯҳфаҳои хотиравӣ тақдим карда шуд. Раиси вилоят инчунин кулли кӯдакону наврасонро табрик гуфта, барои онҳо тамоми хушиҳои зиндагиро таманно намуд.
Маҷмааи фарҳангию таърихии «Қалъаи Хуҷанд» ба як идҷойи воқеӣ табдил ёфт ва нишоту шодмонии кӯдаконро ҳадду канор набуд. Тамошои намоиши ҳунармандоне, ки дар тан либосҳои персонажҳои афсонавиро доштанд, барои кӯдакон завқи дучанд бахшид ва онҳо суруру шодмониашонро бо хандаҳои беғаши хеш баён месохтанд. Дар ин макон гӯшаи зиндаи ҳайвоноту паррандаҳои гуногун, гӯшаи саломатӣ ва аёниятҳои таблиғи тарзи ҳаёти солим, гӯшаи техникони наврас, барномаҳои фарҳангии кӯдакистонҳо ташкил гардида, маҳсули меҳнати дастии хонандагони макотиби вилоят ба намоиш гузошта шуд, ки кӯдакону наврасон аз тамошобинони асосии чунин гӯшаҳо буданд.
Дар ин рӯз ба ҳамаи кӯдакон, яъне ба беш аз 3 ҳазор иштирокчии чорабинии идона нӯшокиҳои ташнагишикан ва яхмосу шириниҳои гуногун ба таври ройгон пешниҳод карда шуданд. Кӯдакону наврасон инчунин аз Оши палаве, ки барояшон омода гардида буд, истеъмол намуда, то дергоҳ шодмонӣ намуданд.
Бояд гуфт, ки аз ҷониби Асосгузори сулҳу Ваҳдати миллӣ — Пешвои миллат, Президенти кишвар мӯҳтарам Эмомалӣ Раҳмон ба тарбияи насли наврас диққати махсус зоҳир гардида, ҳамасола дар саросари кишвар теъдоди зиёди мактабу кӯдакистонҳои замонавӣ сохта, ба истифода дода мешавад. Ҳамзамон, дар асоси дастуру супоришҳои Пешвои миллат кӯдакону наврасони ятиму бепарастор ба таври ҳамешагӣ ба ғамхорӣ фаро гирифта мешаванд. Аз ҷумла, дар арафаи Рӯзи байналмилалии ҳифзи кӯдакон дар тамоми мактаб-интернатҳо, хона-интернатҳо, муассисаҳои махсуси томактабӣ, хонаи кӯдакон чорабиниҳои идона баргузор шуда, бошандагони чунин муассисаҳо аёдат карда шуданд. Дар чорабинии имрӯза низ теъдоди зиёди бошандагони мактаб-интернатҳо ҷалб гардиданд.
Дар охири чорабинӣ аз ҷониби истеъдодҳои ҷавони вилоят барномаи фарҳангӣ манзур карда шуд ва фазои шаҳри бостонӣ пур аз танини суруду мусиқии тоҷикӣ гардид.
Қобили қайд аст, ки имрӯзҳо дар қаламрави вилоят зиёда аз 900 мактаби таҳсилоти миёнаи умумӣ, беш аз 200 боғчаи бачагона ва 20 хонаи кӯдакон, мактаб-интернатҳо барои кӯдакони ятиму бепарастор ва имконияташон маҳдуд фаъолият мебаранд ва дар онҳо кӯдакону наврасон ба таълиму тарбия фаро гирифта шудаанд.
Дар ин рӯзи фархунда тамоми кӯдакони Тоҷикистон ва ҷаҳонро бо Рӯзи байналмилалии ҳифзи кӯдакон табрик гуфта, ба ҳамаашон осмони софу беғубор, хушбахтӣ ва саломатӣ хоҳонем.
Исломҷон Бобоев
Нет комментариев