Санаи 31-уми майи соли ҷорӣ таҳти раёсати муовини якуми Раиси Маҷлиси намояндагони Маҷлиси Олии Ҷумҳурии Тоҷикистон Маҳмадалӣ Ватанзода ҷаласаи навбатии Шӯрои Маҷлиси намояндагон баргузор гардид, ки дар он лоиҳаи Кодекси манзили Ҷумҳурии Тоҷикистон мавриди баррасӣ қарор гирифт.
Мутобиқи моддаи 58-и Конститутсияи Ҷумҳурии Тоҷикистон лоиҳаи Кодеси мазкур бо тартиби ҳуқуқи ташаббуси қонунгузорӣ аз тарафи Президенти Ҷумҳурии Тоҷикистон барои баррасӣ ба Маҷлиси намояндагони Маҷлиси Олии Ҷумҳурии Тоҷикистон пешниҳод шудааст.
Таъкид гардид, ки мутобиқи Конститутсияи Ҷумҳурии Тоҷикистон ҳар як шаҳрванд ҳуқуқ ба манзил дорад. Ҳама гуна амал (беамалӣ), ки барои татбиқи ҳуқуқ ба манзил монеъ мегардад, манъ аст. Ҳуқуқ ба манзил танҳо дар асоси қонунгузории Ҷумҳурии Тоҷикистон метавонад маҳдуд карда шавад.
Шаҳрвандон бо ихтиёри худ ҳуқуқҳои манзилии ба онҳо тааллуқдоштаро амалӣ менамоянд. Инчунин онҳо дар амалӣ намудани ҳуқуқҳои худ ба манзил аз рӯи шартнома ва асосҳои дигари пешбининамудаи қонунгузорӣ озод мебошанд.
Дар ҷаласаи Шӯро лоиҳаи Қонуни конститутсионии Ҷумҳурии Тоҷикистон «Дар бораи ворид намудани тағийру иловаҳо ба Қонуни конститутсионии Ҷумҳурии Тоҷикистон «Дар бораи Суди конститутсионии Ҷумҳурии Тоҷикистон» баррасӣ шуд, ки ҷиҳати иҷрои барномаи ислоҳоти судӣ-ҳуқуқӣ дар Ҷумҳурии Тоҷикистон барои солҳои 2019-2021 ва бо мақсади такмили фаъолияти Суди конститутсионӣ таҳия гардидааст.
Ҳамчунин лоиҳаи Қонуни Ҷумҳурии Тоҷикистон оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи сиёсати давлатӣ дар соҳаи саноат» ва Созишномаи дастгирӣ байни мақомоти иҷроияи ҳокимияти давлатии шаҳри Кӯлоб ва Бонки Аврупоии Таҷдид ва Рушд оид ба лоиҳаи «Обтаъминкунӣ ва корези шаҳри Кӯлоб», ки 2 марти соли 2021 дар шаҳри Душанбе ба имзо расидааст ва аз тарафи Ҳукумати Ҷумҳурии Тоҷикистон барои тасдиқ ба Маҷлиси намояндагони Маҷлиси Олии Ҷумҳурии Тоҷикистон пешниҳод гардидааст, мавриди баррасии вакилони Маҷлиси намояндагони Маҷлиси Олии Ҷумҳурии Тоҷикистон карор гирифтанд.
Манбаъ: АМИТ «Ховар»
Нет комментариев