Olá amigos. Дар аввал чанд хабари нав аз Бозиҳои ХХХI тобистонаи олимпӣ.
Дар намуди заврақронӣ дар каноэ ба масофаи 200 метр зудтар аз ҳама варзишгар аз Украина Юрий Чебан ба марра расид, дар мақоми дуюм Валентин Демяненко аз Озарбойҷон аст. Дар масофаи 1000 метр ҷуфти варзишгарзанон аз давлати Олмон ва дар масофаи 200 метр ҷуфти Испания беҳтарин дониста шуданд.
Дар намуди бокс дар вазни то 81 кг варзишгар аз Қазоқистон Одилбек Ниёзимбетов ба намояндаи давлати Куба Хулио ла Крусу мағлуб гардид. Дар вазни то 56 кг Владимир Никитин аз Русия ва Муродҷон Аҳмадалиев аз Ӯзбекистон ҷойи сеюмро ишғол карданд. Дар вазни то 75 кг низ варзишгари озарбойҷонӣ Камран Шахсуварлӣ мақоми сеюмро касб намуд.
Дар бозии ниҳоӣ аз рӯи намуди таэквандо дар вазни то 68 кг Алексей Денисенко аз Русия ба намояндаи давлати Иордания Аҳмад Абугхауш мағлуб шуд. Дар вазни то 57 кг байни занон Джейд Джонс аз Британияи Кабир ғалаба ба даст овард.
Дар муҳорибаи занона дар вазни то 75 кг медали тилло насиби варзишгар аз Канада Элизабет Вибе шуд. Медали нуқраро Гузел Манюрова аз Қазоқистон бурд намуд. Медали биринҷӣ насиби Екатерина Букина аз Русия гардид.
Дар намуди варзиши сабук бо масофаи 200 метр байни мардон Усэйн Болт аз Ямайка ғолиб баромад. Дар масофаи 400 метр Керрон Клемент аз ИМА ғалаба кард. Дар ҳамин масофа байни занон медали тиллоро Далайла Муҳаммад боз ҳам аз ИМА соҳиб шуд.
Дар намуди бадминтон байни занон ҷуфти варзишгарон аз Ҷопон беҳтарин дониста шуданд.
Дар триатлон ғалаба насиби Алистер Браунлӣ аз Британияи Кабир гардид.
Намояндаи давлати Иордания Аҳмад Абугауш дар мусобиқаи ниҳоӣ оид ба таэквандо Алексей Денисенкоро аз Русия мағлуб намуд. Хурсандибахш он аст, ки ин нахустин медали тилло дар таърихи Иордания мебошад.
Варзишгари Амрико Эштон Итон медали тиллоро бурд карда, бо 8893 хол рекорди олимпӣ гузошт. Рекорди ҷаҳонӣ низ бо 9045 хол ба ӯ тааллуқ дорад.
Боз як рекорди олимпиро варзишгари Русия Александр Лесун дар намуди шиноварӣ гузошт. Ӯ ҳамагӣ 28 маротиба ғолиб баромада, 268 хол ба даст овардааст.
Полиси Рио-де-Жанейро нисбат ба ду шиновари дастаи мунтахаби ИМА Райан Лохте ва Джеймс Фейген айбдорнома пешниҳод кард. Варзишгарон ба шоҳидии бардурӯғ гунаҳкор дониста мешаванд.
Дучархарони Бразилия Клебер да Силва Рамос ва шиновари Хитой Чэн Синъӣ аз иштирок дар Бозиҳои олимпии Рио-де-Жанейро барканор карда шуданд. Сабаби он натиҷаи манфии санҷиши допингии варзишгарон аст.
Вазнбардори Қирғизистон Иззат Ортиқов дар вазни то 69 кг аз медали биринҷии Олимпида маҳрум шуд. Дар санҷиши допингии ӯ маводи заҳролуди стрихнин ба қайд гирифта шуд.
Имрӯз дар Бозиҳои тобистонаи олимпӣ 22 маҷмӯи медалҳо бурд карда мешаванд. 7 маҷмӯи медал дар варзиши сабук, 2 маҷмӯъ дар бадминтон, муҳорибаи озод, таэквондо, 1 маҷмӯъ дар намуди бокс, шиноварӣ, аспдавонӣ.
Пас аз рӯзи сенздаҳуми бозиҳо бо 35 медали тилло дар мақоми якум ИМА, дар ҷойи дуюм Британияи Кабир бо 22 медали тилло ва дар мақоми сеюм Хитой бо 20 медали тилло қарор доранд.
Хотиррасон менамоем, ки ҳамкори лоиҳа мағозаи “IAMDIFFERENT” аст.
Тамошо кардани Олимпиадаро идома медиҳем.
Хайр, то рӯзи дигар!
Нет комментариев