27 октябр дар шаҳри Теҳрон ҷаласаи дуюми вазирони корҳои хориҷии кишварҳои ҳамсояи Афғонистон дар шакли 6+1 бо иштироки Федератсияи Русия баргузор гардид, ки дар он Вазири корҳои хориҷии Ҷумҳурии Тоҷикистон Сироҷиддин Муҳриддин иштирок ва суханронӣ намуд. Дар ин бора АМИТ «Ховар» бо истинод ба Вазорати корҳои хориҷии Тоҷикистон хабар медиҳад.
Сироҷиддин Муҳриддин дар суханронии худ зикр кард, ки вазъи мушкили имрӯзаи Афғонистон аз ҳамсояҳои наздиктарин тақозо мекунад, ки барои барқарории сулҳу субот дар ин кишвар талоши бештар кунанд.
Вазъияти душвори ин кишвар, ба гуфтаи вазир, ҳоло на танҳо барои мардуми Афғонистон, балки яке аз мушкилоти шадиди минтақавӣ ва ҷаҳонӣ низ шудааст.
Таъкид гардид, ки Тоҷикистон ҳама гуна шаклҳои қонуншиканӣ, куштор, ғоратгарӣ ва таъқиби мардуми Афғонистонро шадидан маҳкум мекунад.
Тоҷикистон дар ин рӯзҳои душвор барои Афғонистон, ки тамоми мардуми афғон дар остонаи фалокати башардӯстона қарор дорад, бетараф буда наметавонад.
Ба гуфтаи Сироҷиддин Муҳридин, Тоҷикистон ҳамеша аз барқарории сулҳу субот дар Афғонистон пуштибонӣ мекард ва ба ин мавқеъ содиқ мемонад.
Аз вазъи вилояти Панҷшер, инчунин набудани асосҳои демократӣ, поймол шудани ҳуқуқи инсон, бахусус ҳуқуқи занон изҳори нигаронӣ карда шуд.
Тавре зикр гардид, Тоҷикистон ҳамеша аз таъсиси ҳукумати фарогир бо иштироки тамоми қувваҳои иҷтимоӣ ва этносиёсии кишвар ҷонибдорӣ мекард.
Вазири корҳои хориҷии Ҷумҳурии Тоҷикистон бори дигар аз ҷомеаи ҷаҳонӣ даъват кард, ки барои таъмини сулҳу субот дар Афғонистон ва ба эътидол овардани вазъи душвори сиёсиву амниятӣ бо роҳи музокирот ҳарчӣ зудтар тадбирҳои фаврӣ андешанд.
Дар хотима изҳороти муштарак ба имзо расид.
Манбаъ: АМИТ «Ховар»
Нет комментариев