Созишномаи грантиро Сафири Фавқулода ва Мухтори Ҷопон дар Ҷумҳурии Тоҷикистон Такаюки Мияшита ва раиси шаҳри Истаравшан Адҳам Маъмурзода имзо карданд.
Лоиҳаи бунёди мактаби нав дар чаҳорчӯби Барномаи кумакҳои бе бозгашт ва амнияти башардӯстонаи ҳукумати Ҷопон (GGP) амалӣ мешавад. Бино ба иттилои дафтари матбуоти ҳукумати шаҳри Истаравшан, санаи 28 октябр дар сафорати Ҷопон дар Тоҷикистон маросими имзои лоиҳаи нави «Сохтмони мактаби ибтидоӣ дар деҳаи Тағи Чинори ҷамоати деҳоти Гули Сурхи шаҳри Истаравшан» ба маблағи умумии 89,866 доллари ИМА баргузор гардид.
Барномаҳои ҳукумати Ҷопон оид ба кӯмаки ройгон ва амнияти башардӯстона барои аҳолии васеъ , пеш аз ҳама ба мақомоти маҳаллӣ, муассисаҳои таълимӣ ва тиббӣ ва созмонҳои ғайридавлатии байналмилалӣ дар кишварҳои рӯ ба тараққӣ пешниҳод карда мешаванд.
Аз соли 1996 инҷониб дар чаҳорчӯби кумакҳои бебозгашт ба лоиҳаҳои таъмини амнияти башардӯстона барои аҳолии васеъ аз ҷониби Ҳукумати Ҷопон 437 лоиҳаи башардӯстона ба маблағи умумии 35,8 миллион доллари ИМА, ки ба рушди Ҷумҳурии Тоҷикистон нигаронида шудаанд, дастгирӣ шудааст.
Манбаъ: Аз рӯйи маводи ОИ «Sugdnews.com”
Нет комментариев