Ин навбат муаррифии Лоиҳаи “Харитаи экологӣ”-и шаҳри Хуҷанд дар Муассисаи таҳсилоти миёнаи умумии рақами 23-юми шаҳри Хуҷанд баргузор гардид.
Дар он бештар аз 150 нафар омӯзгорон ва хонандагони мактаб иштирок намуданд.
Зикр гардид, ки наздик як моҳ мешавад Лоиҳаи мултимедиявии “Харитаи интерактивии бакҳо ва қуттиҳои партов, нуқтаҳои қабули фурӯзонакҳои каммасрафи корношоям, макони оббозӣ (пляж) ва ҳоҷатхонаҳои ҷамъиятии шаҳри Хуҷанд” дар амал татбиқ шуда истодааст.
Мақсади асосии лоиҳа – ҳамкории ВАО бо аҳолӣ ва сохтору идораҳои дахлдори Мақомоти иҷроияи ҳокимияти давлатии шаҳр мебошад, ки он барои иттилоотонии саривақтии шаҳрвандон ва тарбияи экологии насли наврас ва ҷавонон мусоидат хоҳад кард.
Ҳамзамон, огоҳии иттилоотӣ ва баланд бардоштани маърифати экологии шаҳрвандон, бахусус ҷавонон ва насли наврас аз ҳадафҳои асосии лоиҳа маҳсуб мешавад.
Ин аст, ки мулоқоту вохӯриҳои гӯрӯҳи корӣ ва муаррифии лоиҳа маҳз дар мактабҳои миёна доир шуда истодааст.
Вазифаҳои асосии лоиҳа ин муайян кардани вазъияти кунунии (маҳаллаву микроноҳияҳо, шумора, ҷадвали корӣ) бак ва нуқтаҳои партов, ҳоҷатхонаҳои ҷамъиятӣ, нуқтаҳои қабули фурӯзонакҳои каммасрафи корношоям мебошад.
Лоиҳа инноватсионӣ буда, формати он мултимедиявӣ, яъне бисёррасонавӣ мебошад.
Зимни муаррифӣ гуфта шуд, ки мӯҳлати давомнокии марҳилаи аввали лоиҳа 3 моҳ буда, дар он 10 маҳаллаи шаҳри Хуҷанд: Пахтакор, Раззоқ, Панҷшанбе, Гулбаҳор, Бофандаи соҳили чапи дарё ва микроноҳияҳои 8-ум, 13-ум, 20-ум, 32-юм ва 34-уми соҳили рости дарё мавриди таҷрибаю санҷиш қарор мегиранд.
Шаҳрвандони фаъол, бахусус мактабхонони синну соли гуногун дар амалишавии лоиҳаи “Харитаи экологӣ”-и шаҳри Хуҷанд саҳми арзандаи хешро гузошта метавонанд. Барои ин онҳо метавонанд аксҳои бо таҷҳизоти мобилии худ гирифтаашонро вобаста ба мавҷудияти партов дар кӯчаҳо ва маҳаллаҳои ҷои зист, тавассути Вотсапп (Whatsapp) ва ё Вайбер ба рақами 92-882-66-66 ирсол намоянд. Иштирокчиёни фаъолро тӯҳфаҳои арзанда интизор аст!
Дар қисми дуюми вохӯрӣ байни гурӯҳи корӣ ва устодону толибилмон дар мавзӯи тарзу усули гирифтан ва фиристодани аксҳо саволу ҷавоб сурат гирифт.
Ҳамин тариқ, муаррифии Лоиҳаи мултимедиявии “Харитаи экологӣ”-и Хуҷанд ҷолиб ва барои иштирокдорон – устодону хонандагони Муассисаи таҳсилоти миёнаи умумии рақами 23-юми шаҳри Хуҷанд шавқовар ва хотирмон гузашт.
Гурӯҳи кории Лоиҳаи “Харитаи экологӣ”
Нет комментариев