10 ноябр бозиҳои мавқуфмондаи даври 23-юми Чемпионати Тоҷикистон оид ба футбол миёни дастаҳои лигаи олӣ баргузор шуданд. Дар ин давр ягон ҳангома рух надод. Пешсафони ҷадвали чемпионат ин навбат низ бар ҳарифон ғалаба карданд. Тими Клуби марказии варзиши артиш (КМВА) ба дарвозаи тими «Куктош» тавассути Элчибек Рашидбеков ва Идрис Амин ду голи беҷавоб зада, мавқеашро дар ҷои сеюм мустаҳкамтар намуд. Тими «Истиқлол»-и Душанбе, ки дар садри ҷадвал аст, дар сафар бар дастаи «Эсхата» бо ҳисоби 3:0 пирӯз шуд. Голҳоро Петар Патев, Манучеҳр Ҷалилов ва Рустам Соиров ба номашон сабт карданд.
Дар бозии дигар «Истаравшан» дастаи «Равшан»-ро шикат дод – 1:0. Голи ягонаро Илҳомҷон Баротов зад. Воқеан, Илҳомҷон беҳтарин бозингари давр эълон шуд. «Хуҷанд» дар майдони худ бар дастаи «Хатлон» бо ҳисоби 2:1 ғолиб омад. Нимаи аввали бозӣ бе гол хотима ёфт. Артём Сердюк дар дақиқаи 52 бар суди тими мизбон ҳисобро кушод. Дар дақиқаи 76 Парвиз Боқӣ-Охунов аз пеналтӣ ҳисобро баробар кард. Голи пирӯзиоварро Алишер Баротов дар дақиқаи 80 зад. Дар бозии охирини давр дастаи «Душанбе» аз тими «Файзканд» мағлуб шуд – 0:1. Голро Доробҷон Эргашев дар дақиқаҳои иловагии бозӣ (90+2) зад.
Ҳамин тариқ, бо натиҷагирӣ аз 24 даври бозиҳо «Истиқлол» бо 58 хол пешсаф аст. «Хуҷанд», ки нисбат ба тими пойтахт 10 хол камтар дорад, дар ҷои дуюм, КМВА бо 39 хол дар ҷои сеюм мавқеъ доранд.
Манбаъ: Варзиш-ТВ
Нет комментариев