Хонандагони тоҷик дар Олимпиадаи байналмилалии Copernicus аз фанҳои биология, математика, химия ва физика, ки дар иёлати Техаси ИМА баргузор гардид, иштирок намуда, сазовори 9 медал гардиданд. Дар ин бора сардори Раёсати муассисаҳои томактабӣ ва миёнаи умумии Сарраёсати маорифи шаҳри Душанбе Асомиддин Бобозода ба АМИТ «Ховар» хабар дод.
Олимпиадаи мазкур аз 7 то 9 январ баргузор гардида, дар он хонандагони Мактаби байналмилалии президентӣ миёни 25 давлати дунё иштирок намуда, ба гирифтани 2 медали нуқра ва 7 медали биринҷӣ мушарраф гардиданд.
Соли равон бори аввал хонандагони тоҷик дар олимпиадаҳои байналмилалӣ иштирок карда, бо ҷойҳои намоёну ифтихорӣ ба Ватан баргаштанд.
Бояд тазаккур дод, ки Ҳукумати Тоҷикистон дар даврони соҳибистиқлолӣ ҳадафи муҳимтарин ва самти афзалиятноки сиёсати иҷтимоии худро беҳбуд бахшидан ба маорифи миллӣ, баланд бардоштани сифати таҳсилоти мактабӣ, ворид шудан ба фазои таҳсилоти байналмилалӣ ва истифодаи стандартҳои байналмилалии таълим эълон кардааст.
Ҳамин аст, ки Президенти Тоҷикистон, Пешвои миллат муҳтарам Эмомалӣ Раҳмон бо фармони худ аз 31 январи соли 2020 солҳои 2020-2040-ро «Бистсолаи омӯзиш ва рушди илмҳои табиатшиносӣ, дақиқ ва риёзӣ дар Ҷумҳурии Тоҷикистон дар соҳаи илм ва маориф» эълон карданд.
«Дастоварди навбатии хонандагони пойтахт низ дар партави дастурҳои Пешвои миллат дар самти рушди илмҳои табиашиносӣ, дақиқ ва риёзӣ ба ҳисоб меравад»,- иброз дошт мавсуф.
Ба зикри Асомиддин Бобоев, «дастоварди навбатии хонандагон шаҳодати он аст, ки мақомоти иҷроияи ҳокимияти давлатии шаҳри Душанбе зери роҳбарии Раиси шаҳри Душанбе муҳтарам Рустами Эмомалӣ барои хонандагони муассисаҳои таълимии пойтахт беҳтарин шароити таълиму тадрис фароҳам овардааст. Натиҷаи ин иқдом ноил гардидан ба дараҷаи баланди сатҳи дониши хонандагон на танҳо дар сатҳи ҷумҳурӣ, балки дар арсаи байналмилалӣ мебошад».
Манбаъ: АМИТ «Ховар»
Нет комментариев