- Агар хоҳед, ки питсаи Шумо ба монанди классикӣ тайёр карда шавад, орди муқаррарии сафеди гандумӣ ва орди аз намуди сахти гандуми тайёркардашударо, ки дурум ном дорад, истифода баред. Аз сабаби он, ки дарёфт намудани орди дурум душвор аст, бинобар ин метавонед ба ҷои он орди гандуми навъи дуюм ГОСТ-16439-70-ро истифода баред.
- Намудҳои хеле зиёди тайёр кардани хамир барои питса вуҷуд дорад. Хамири классикӣ барои питса аз омехтаи ду намуди орди дар боло зикршуда, об хамиртуруш, равғани зайтун ва намак тайёр карда мешавад.
- Питсаи ҳақиқии итолиёвӣ дар оташдони махсус пухта мешавад. Аммо дар хона питсаро дар тафдон (духовка)-и то 200 дараҷа тафсон кардашуда пухтан мумкин аст. Питсаро дар тобаи тагаш ғафс низ мепазанд. Дар ҳама ҳолат таг ва девори зарфро бо равғани зайтун молида орд пошед. Агар питсаро дар тоба пазед, пас хамирро ғел надода, бо эҳтиёт онро бо ангуштонатон дар тамоми сатҳи тоба кашед.
Пеш аз он ки ба хамир қимаро гузоред, онро бояд 10 дақиқа нигоҳ доред. Муддати миёнаи пухтани питса тахминан 30-40 дақиқа аст ва вобаста аз намуди хамир ва таркиби қима тағйир меёбад.
- Ба ғайр аз питсаи кушода дар ҷаҳон питсаи пӯшида машҳур аст, ки дар он қима байни ду қабати хамир гузошта мешавад. Барои тайёр кардани чунин питса хамири пешакӣ тайёршударо ба ду қисм ҷудо карда, ду нони доирашаклро ғел занонед. Нони поёнро бо соус молида, дар он тавре қима гузоред, ки гӯшаҳои он 2 см холӣ монад, панири қимакардашударо пошед ва канорҳояшро бо об тар кунед. Аз болои қима нони дуюмро гузоред ва канорҳояшро часпонед.
Питсаро бо равған ғафс молед ва барои баромадани буғ сӯрохиҳои хӯрдакак карда, то тиллоранг шудани он пазед.
- Соуси аз ҳама маъмул барои питса соуси томатӣ ҳисобида мешавад.
- Питсаи моҳигиро ҳам бо соуси томатии сурх ва ҳам бо соуси сафед тайёр мекунанд. Барои питса моҳии шӯр, ҷӯшонида, дудхӯрдаро истифода мебаранд. Барои питса дигар намуди маҳсулоти баҳрӣ, ба монанди моллюскҳо, гӯшти харчангӣ ва ҳатто икра истифода мешавад.
- Питсаи дар шароити хона тайёркардашуда бо самак (моҳии дарранда)-и консверкардашуда хеле болаззат ва оддӣ аст. Помидори майда буридашуда, сирпиёз (чеснок)-и майдакардашуда, панири аз турбтарошак гузаронидашуда, қаламфури майдаи сиёҳ ва намакро аралаш кунед. Омехтаи тайёрро дар болои хамир гузоред, аз болояш пораҳои на он қадар калони самаки дар равғанбуда, бехпиёз, ки нимдоира бурида шудааст, илова кунед, шибит (укроб)-и сабз ва панири аз турбтарошак гузаронидашуда пошед. Дар тафдон ним соат пазед.
- Албатта питса на танҳо бо гӯшт, моҳӣ ва сабзавот бомазза аст. Ҷои махсусро питсаи ширин, ки ҳамчун десерт (шираворӣ) пешкаш карда мешавад, ишғол мекунад. Барои қимаи чунин питса одатан панири маскарпоне, меваҳои тару тозаи ширин ё хушк, чормағзҳо гирифта мешавад.
Нет комментариев