Санаи 5 апрел дар майдони Спитамени ноҳияи Спитамен як гурӯҳи ҷавонон, ки ихтиёран ба комиссариати ҳарбии ноҳия барои хизмат дар сафи Қувваҳои Мусаллаҳи кишвар ариза пешниҳод намуда буданд, дар вазъияти тантанавӣ ба хизмати Ватан-Модар гусел карда шуданд.
Дар маросими гусели даъватшавандагон раиси ноҳияи Спитамен, роҳбарони мақомоти ҳифзи ҳуқуқ, раисони ҷамоатҳо, волидони даъватшавандагон ва дигар шахсони масъул иштирок доштанд.
Нахуст раиси ноҳия Сулаймонзода Акрам Раҳим сарбозони ояндаи Ватанро бо ин рӯзи таърихӣ шодбош намуда, таъкид дошт, ки ҷавонони ноҳия – наваскарони оянда, ҳамчун давомдиҳандагони кори насли калонсолон хизмати Ватанро содиқона ба ҷо оварда, сиҳату саломат ба зодгоҳашон бармегарданд.
Зикр гардид, ки хизмати ҷавонон дар сафи Қувваҳои Мусаллаҳ, мактаби мукаммали ҳаёт аст, ки ба онҳо дарси ҷавонмардиву шуҷоат омӯхта, ҷисману рӯҳан обутоб мебахшад. Бо дастгириҳои пайвастаи Асосгузори сулҳу Ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон шароит дар қисмҳои низомӣ хеле беҳтар гардидааст.
Дар чорабинӣ комиссари ҳарбии ноҳия Расул Абдуллоев, раиси Шӯрои собиқадорони меҳнати ноҳия Иномҷон Тураев, раиси Шӯрои духтарони ноҳия Диёра Шарипова ба сухан баромада, баробари изҳори сипос ба ҷавонони даъватшаванда, аз дигар ҷавонони ноҳия даъват ба амал оварданд, ки дар сафи Артиши миллӣ хизмат намуда, масъулияти шаҳрвандии худро анҷом диҳанд.
Қайд кардан ба маврид аст, ки дар рӯзи аввали даъвати баҳоронаи ҷавонон ба сафи Қувваҳои Мусаллаҳи Ҷумҳурии Тоҷикистон бештар аз 60 нафар ҷавонон сафарбар карда шуданд.
Рӯзи гузашта ҳамчунин, дар назди муассисаи давлатии Театри мусиқӣ-драммавии ба номи Маҳмудҷон Воҳидови ноҳияи Ашт маросими гусели аввалин гурӯҳи наваскарон доир гардид.
Дар ҷамъомади тантанавӣ раиси ноҳия Зариф Мирдадо, прокурори ноҳия Раҳмонзода Абдусамӣ, кормандони мақомоти иҷроияи ҳокимияти давлатии ноҳия ва намояндагони комиссариати ҳарбӣ иштирок намуданд.
Раиси ноҳияи Ашт Зариф Мирдадо зимни сухаронии худ таъкид намуд, ки хазмат ба Ватан қарзи ҳар ҷавонмарди бонангу номуси ноҳия ба ҳисоб рафта, имрӯз ҷавонмардони далери ноҳия ихтиёран ба хизмати ҳарбӣ сафарбар мешаванд.
Дар маросими гусели аввалин гурӯҳи ихтиёриён аз ноҳияи Ашт 80 нафар даъватшавандагон ба хизмати ҳарбӣ сафарбар гардиданд.
Манбаъ: http://sugd.tj/
Нет комментариев