30 март дар шаҳри Анқара бо ибтикори Сафорати Ҷумҳурии Тоҷикистон дар Ҷумҳурии Туркия тантанаҳои фарҳангӣ бахшида ба ҷашни байналмилалии Наврӯз баргузор гардиданд. Дар ин бора АМИТ «Ховар» бо истинод ба Сафорати Ҷумҳурии Тоҷикистон дар Ҷумҳурии Туркия хабар медиҳад.
Дар ҳамоиши мазкур вазири саноат ва технологияи Ҷумҳурии Туркия, ҳамзамон ҳамраиси Комиссияи байниҳукуматии Тоҷикистону Туркия оид ба ҳамкории иқтисодӣ Мустафа Варанк, раиси Гурӯҳи дӯстии байнипарлумонии Тоҷикистон ва Туркия Аҳмет Узер, намояндагони мақомоти давлатӣ, корпуси дипломатии муқими Анқара, ҳамватанони бурунмарзӣ, донишҷӯёни тоҷик, соҳибкорон ва ВАО иштирок доштанд.
Сафири Фавқулодда ва Мухтори Ҷумҳурии Тоҷикистон дар Ҷумҳурии Туркия Ашрафҷон Гулов маросимро оғоз карда, ҳозиринро бо ҷашни байналмилалии Наврӯз табрик намуда, зикр кард, ки «Наврӯз нифоқу низоъ ва бераҳмиву бешафқатиро аз қалби одамон дур месозад ва дар вуҷуди инсонҳо эҳсоси дӯстиву бародарӣ, меҳру шафқат ва эҳтирому садоқатро зиёдтар намуда, ба ҳар фард аз рӯзи нек мужда мерасонад».
Ҳамзамон иброз гардид, ки бо ташаббуси роҳбарони давлатҳои ҳавзаи Наврӯз, аз ҷумла Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ин ҷашни бостонӣ байналмилалӣ гардида, дар Феҳристи мероси ғайримоддии ЮНЕСКО қарор дода шудааст.
Дар идома Мустафа Варанк низ ҳозиринро бо ҷашни Наврӯз табрик гуфта, зикр кард, ки Тоҷикистон дӯсти қадим ва шарики муҳими Туркия буда, бо иродаи раисиҷумҳури Туркия ва дӯсти наздики ӯ Президенти Ҷумҳурии Тоҷикистон муҳтарам Эмомалӣ Раҳмон вақтҳои охир равобит байни ду кишвар дар ҳама соҳаҳо рушд намуда истодааст.
Ҷашни Наврӯзи бостонӣ бо баргузории намоиши коллексияи либосҳои миллии тарроҳ Умед Кучкалиев ва барномаи гурӯҳи рақсии театри «Падида» рӯҳияи ҳозиринро шод гардонид.
Дар намоиш сӯзаниҳо, расмҳо, либосҳои миллӣ, асбоби мусиқии маҳсули дастони пурэъҷози ҳунармандон ва дигар намунаи маҳсулоти тарғибкунандаи ҳунарҳои мардумии Тоҷикистон манзур гардиданд. Инчунин ба таваҷҷуҳи иштирокчиён наворҳои муаррифи Тоҷикистон ва таронаҳои ҷолиб пешниҳод гардиданд.
Дар яке аз гӯшаҳои толор кати миллӣ бо дастархони идона ва рамзҳои наврӯзӣ — ҳафтсину ҳафтшин ташкил шуда, хӯрокҳои наврӯзӣ- оши палов, далда ва суманак ба хоҳишмандон пешкаш гардид.
Ҷиҳати муаррифии Тоҷикистони офтобӣ ба ҳозирин дар толор инчунин маҳсулоти хушкмеваи ватанӣ намоиш ва пешниҳод шуд.
Чорабинии мазкур дар воситаҳои ахбори оммаи кишвари иқомат ба таври васеъ инъикос гардид.
Манбаъ: АМИТ «Ховар»
Нет комментариев