12 апрел вохӯрии Сафири Фавқулода ва Мухтори Ҷумҳурии Тоҷикистон дар Ҷумҳурии Қазоқистон Хайрулло Ибодзода бо муовини Вазири савдо ва ҳамгироии кишвари иқомат Кайрат Торебаев баргузор гардид. Дар ин бора АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад.
Зимни вохӯрӣ ҷонибҳо масъалаҳои рушду тавсеаи ҳамкории дуҷонибаро дар соҳаҳои иқтисод, тиҷорат, саноат ва логистика баррасӣ намуданд.
Инчунин ҷонибҳо мавзӯи баргузории ҷаласаи навбатии Комиссияи байниҳукуматии Тоҷикистон ва Қазоқистон оид ба ҳамкории иқтисодиро мавриди муҳокима қарор доданд.
Ёдовар мешавем, ки иқтидори ҳамкории иқтисодии тарафайн бузург мебошад. Ҷаласаҳои Комиссияи байниҳукуматии ҳамкории иқтисодӣ мунтазам баргузор мешаванд. Ҷаласаи охирини он 16-17 марти соли 2021 дар Тоҷикистон доир гардид.
Дар доираи ҷаласаи навбатии комиссияи байниҳукуматӣ ҷаласаи 3 -юми гурӯҳи корӣ барои афзоиши тиҷорати дуҷониба ва номгӯи молҳои содиротӣ миёни Ҷумҳурии Тоҷикистон ва Ҷумҳурии Қазоқистон баргузор гардид, ки дар он чораҳои зарурӣ ба афзун гардонидани тиҷорат ва рафти иҷрои Харитаи роҳ оид ба афзоиши тиҷорат миёни Ҷумҳурии Тоҷикистон ва Ҷумҳурии Қазоқистон барои солҳои 2018-2022 мавриди баррасӣ қарор гирифтанд.
Инчунин дар доираи ин ҷаласа форуми сармоягузории Тоҷикистон ва Қазоқистон баргузор гардид.
Манбаъ: АМИТ «Ховар»
Нет комментариев