Аминҷон Абдураҳимов дар озмуни байналмилалии «Многогранный Петербург» (Петербурги гуногун) мақоми аввалро ба даст овард.
Гурӯҳе аз донишҷӯёни фаъоли тоҷик дар озмуни эҷодии байналмилалии «Многогранный Петербург» Тоҷикистонро муаррифӣ карданд. Аъзои «Созмони донишҷӯёни Тоҷикистон» дар ин озмун ба дастовардҳои назаррас ноил шуданд. Баҳовуддин Неъматов дар бахши навозандагӣ ва Алишер Солиев дар бахши овозхонӣ ширкат намуданд. Ҳамчунин Илҳом Давлатов дар бахши суханварӣ ҳунарнамоӣ кард.
Аминҷон Абдураҳимов — донишҷӯи тоҷике, ки дар пойтахти шимолии Русия таҳсил мекунад, дар ин озмун дар бахши хореография ширкат карда, мақоми аввалро соҳиб шуд.
«Шодам, ки дар ин озмун низ пирӯз шудам! Чунин озмунҳо барои ман имкони дигар ҷиҳати муаррифии Ватанам дар Русия мебошад. Аз рӯи як рафтори беҷо дар бораи кулли халқ хулосабарорӣ мекунанд ва як нафар метавонад фикрҳои носозгорро дар бораи Ватани худ бо кирдори намунавӣ аз мағзи ҷомеа бишӯяд. Ҳар бор, ки ҷое ҳунарнамоӣ мекунам, кӯшиш дорам, Тоҷикистонро беҳтар муаррифӣ намоям. Ифтихор дорам, ки аз Тоҷикистон ҳастам!», — гуфт Аминҷон дар сӯҳбат бо Sputnik Тоҷикистон.
Озмуни «Многогранный Петербург»-ро созмони байналмилалии масоили муҳоҷирати шаҳри Санкт-Петербург баргузор кардааст. Дар ин озмун, ки 26 апрели соли 2017 ба поён расид, намояндагони Чин, Муғулистон, Туркманистон, Украина, Шри-Ланка, Эстония ва Тоҷикистон ширкат карданд. Яке аз шартҳои аслии озмун иҷрои ҳамаи барномаҳо бо забони русӣ буд.
Ёдовар мешавем, ки ин нахустин пирӯзии Аминҷон нест ва ӯ дар соли 2016 «Донишҷӯи сол» шинохта шуда буд.
Манбаъ: http://sputnik-tj.com/
Нет комментариев