Ҳоло дар Донишгоҳи миллии Тоҷикистон 21 ҳазору 478 нафар  донишҷӯён таҳисли илм доранд. Онҳо аз рӯйи 93 ихтисос ба таҳсил фаро гирифта шуда, барояшон 1225 нафар устодон дарс мегӯянд.

Ин нуктаро Абдусалом Миралиев, ноиби Ректори Донишгоҳи миллии Тоҷикистон зимни нишасти матбуотии имрӯза, ки бо иштироки ноибони дигари ректор, деканҳо, масъулини  раёсатҳои донишгоҳ доир шуд, дар ҷамъи хабарнигор иброз дошт.

Ба саволи хабарнигори «Pressa.tj»  Оё дар соли ҷорӣ пардохти маблағи шартномаи таҳсили донишҷӯён бинобар тағйир ёфтани васъи бозори асъор, аз ҷумла доллар ва рубл боло ё паст мешавад?

Абдусалом Миралиев, ноиби ректор гуфт: «Бо назардошти курби асъор шояд каме боло равад. Аммо на дар ҳама ихтисосҳо. Бубинед, дар аксари ихтисҳои факултетҳои мо маблағи шартнома хеле арзон аст. Масалан, дар факултети физикаи донишгоҳ донишҷӯи шартномавӣ ҳамагӣ дар як сол 1960 сомонӣ пардохт мекунад. Магар ин зиёд аст? Ҳол он ки волидайни мо ин маблағро барои таҳсили фарзандашон дар боғчаҳо месупоранд».

Ба гуфтаи масъулини донишгоҳ, тағйири нархи шартномаи таҳсили донишҷӯён дар мувофиқа бо Вазорати маориф ва илм, Вазорати рушди иқтисод ва савдо ва Хадамоти зиддиинҳисории Тоҷикистон роҳандозӣ мешавад. Дар ин бора  pressa.tj хабар медихад.