Шоми рӯзи гузашта, санаи 28-уми май дар пояи маҷмааи таърихиву этнографии «Арк»-и шаҳри Бухоро ба ифтихори пӯшидашавии Фестивали байналмилалии анъанавии XVI «Абрешим ва зираворӣ» барномаи бузург ва басо зебои консертии санъаткорони Ҷумҳурии Ӯзбекистон баргузор гардид.
Сароғоз Раиси вилояти Бухоро ба саҳнаи азим ва хеле музайян орододашуда баромада, кулли иштирокчиёни фестивал, бахусус меҳмонони хориҷи кишварро бо ин иди воқеан зебову нотакрор табрик намуда, ҳамагонро ба Бухорои шариф хайра мақдам гуфт.
Барномаи консертӣ бо намоиши театрикунонидашуда, ки ифодагари таърихи пайдоиши ҳунару ҳунармандӣ, маҳз аз Бухорои куҳан гузаштани «Роҳи бузурги Абрешим» ва торафт ташаккулу рушд кардани ҳунарҳои мардумӣ ва бо ин васила беҳтар намудани вазъи зиндагии аҳолӣ буд, оғоз гардид.
Сарояндагон ва раққосагони номии Бухоро ва умуман Ӯзбекистон бо суруду таронаҳои ҷолиб, дилнишин, рӯҳнавоз ва қабл аз ҳама пурмазмун табъи ҷамъомадагонро хеле болида намуданд. Ин буд, ки мардуми тамошогар, ҳатто меҳмонон аз кишварҳои хориҷи дуру наздик рақсу шодмонӣ ва хушҳолӣ намуданд.
Барномаи рангини консертӣ то қариб нисфи шаб идома кард ва ҳамагон аз он баҳраманд шуданд.
Ҳамин тавр, давоми се рӯз (26-28-уми май) дар шаҳри бостонии Бухорои Ӯзбекистон 16-умин Фестивали байналмилалии анъанавии «Абрешим ва зираворӣ» бо шукӯҳу шаҳомати хоса ва хеле хотрмону таассуротбахш доир гардид.
Фестивал бори дигар исбот кард, ки рӯй овардан ва дастгирии ҳамешагии ҳунарҳои мардумӣ ва ҳавасманд намудани ҳунармандон қабл аз ҳама, кишвар ва мардуми онро ба ҷаҳониён ба хубӣ шинос менамояд. Зеро бо шарофати баргузории маҳз чунин намоишу фестивалҳо ташрифу боздиди ҳазорҳо нафар сайёҳони ҷаҳон аз шаҳрҳои дар ҳақиқат назаррабо ва сайёҳӣ, ки садҳо мавзеъҳои туристӣ ва таърихиву фароғатӣ доранд, барои ин кишварҳо хеле манфиатовар аст.
Бо ҳамин 16-умин Фестивали байналмилалии анъанавии «Абрешим ва зираворӣ» кори худро ба интиҳо расонд, вале хонандагони арҷманд, сафари намояндагони Тоҷикистон дар сарзамини Ӯзбекистон идома дорад. Аз шаҳри қадимаи Бухоро субҳи имрӯз, санаи 29-уми май мо озими шаҳри бостониву ҳамешаҷавон ва музайяни Самарқанд хоҳем шуд.
Пас боз ҳам моро дар тамошои мавзеъҳои таърихии Самарқанди куҳан ҳамроҳӣ намоед.
Фонди байналмилалии ҳунарҳои мардумии «Ҳафт Пайкар»
Нет комментариев