Беҳтар аст, ки аз сафар бо худрав худдорӣ кунед ва ҳамаи корҳоятонро субҳ ва ё шомгоҳ анҷом диҳед.
Ҳавошиносон мегӯянд, ки дар Тоҷикистон давоми чанд рӯзи оянда гармои тоқатфарсо мешавад. Интизор меравад, ки ҳарорати ҳаво аз 40 то 43 дараҷа гарм хоҳад шуд.
Дар панҷ рӯзи оянда пешбинӣ мешавад, ки ҳарорати ҳаво то 43 дараҷа гарм шавад, барфу пиряхҳо об мешаванд, оби рӯдхонаҳо туғён карда, хатари фурӯ рехтани селу сангреза меафзояд.
Кумитаи ҳолатҳои фавқулоддаи Тоҷикистон бо такя ба додаҳои Созмони ҳавошиносии кишвар хабар медиҳад, ки аз 6-ум то 10-уми июл дар қаламрави кишвар ҳавои гарму хушк боқӣ мемонад.
Дар чунин ҳавое эҳтимоли гармозада шудан бештар мешавад. Sputnik Тоҷикистон роҳу равишҳои гузарондани гармои тоқатфарсоро ёдоварӣ мекунад.
Пӯшок
Беҳтар аст пӯшоке аз порчаҳои табиӣ ва бо рангҳои равшан ба бар кунед. Кафшҳои пошнабаландро канор бигзореду пойафзоли сабук ва роҳат ба по кунед. Дар гармо сару рӯйро беҳтар аст бо кулоҳ ё сарбанд пӯшонд.
Хуб мешуд аз кремҳои офтобгир барои пешгирӣ аз сӯхтани пӯстатон баҳра бигиред. Ҳамчунин айнаки офтобӣ бояд гузошт то чашмон аз нурҳои сӯзон осеб набиданд.
Об
Аз гармо бадани одам зуд беоб мешавад. Аз ин рӯ бояд зуд — зуд об хӯрду аз ғализ шудани хун пешгирӣ кард.
Хӯрдани обҷав (пиво), нӯшобаҳои ширин ва газдор, оби маъданӣ ташнагиро намешиканад. Беҳтар он аст, ки об, чойи сабзи доғ ё хунук, квас, лимонади табиӣ, обмеваҳои тозафишурдаро хӯрд.
Хӯрдани машруботи алкоголӣ ва қаҳвадор дар гармо зараровар аст.
Хӯрок
Пурхӯрӣ дар гармо низ зараровар аст. Беҳтар он аст, ки кам-кам ва ҳар ду — се соат пас хӯрок хӯрд. Хӯрок бояд хунук, бечарб, камнамак ва витаминдор бошад.
Набояд фаромӯш кард, ки дар ҳавои гарм хатари заҳролуд шудан аз маводи хӯрока бештар мешавад. Аз ин рӯ, бояд ҳангоми хариди хӯрокворӣ, бахусус шир ва маҳсулоти ширӣ, таърихи истеҳсол ва мӯҳлати истифодабариашро ба назар гиред. Ҳама маводи хӯрокаро бояд дар яхдон нигаҳ дошт.
Дар ҳавои гарм бояд қоидаҳои беҳдоштро риоя кард: зуд-зуд дастҳоро бояд шуст, меваву тараборро ношуста нахӯрд ва хӯрокҳои бастабандишударо пеш аз боз кардан бо оби гарм шуст.
Кор
Ҳамаи корҳоро беҳтар аст, ки субҳ ва ё шомгоҳ анҷом дод. Дар нимарӯз, ки гармтарин замон аст, бояд дар ҷои сояву серун истироҳат кард.
Дар гармо варзиш кардан, муштумол ва дигар дармонҳои физикӣ гирифтан зараровар аст. Ҳамчунин ронандагӣ кардан низ хуб нест. Аз гармо ҳавос парту вокуниш кунд мешавад.
Барои хунук кардани хонаҳо аз дастгоҳҳои хунукидиҳанда метавон истифода кард.
Шом агар бо оби хунук душ гирифтаед, ҳатман бо оби гарм худро бишӯед. Пас аз панҷ дақиқа истодан зери оби гарм ҳавои гарм камтар эҳсос мешавад.
Манбаъ: http://sputnik-tj.com/
