Таваҷҷӯҳи давлату Ҳукумати Ҷумҳурии Тоҷикистон ва Мақомоти иҷроияи ҳокимияти давлатии вилояти Суғд нисбат ба ҷавонони касбу кор ва синну соли мухталиф пайваста меафзояд. Ин аст, ки дар Соли ҷавонон ин қишри ҷомеа ба дастоварду нишондиҳандаҳои назаррас ноил мегарданд.
Яке аз чунин ҷавонони фаъолу пешсаф ва соҳиби мавқеи баланд Муродҷон Исмоилов мебошад, ки маводи навбатии мо аз силсилаи «Истеъдодҳои ҷавон дар Соли ҷавонон» оид ба таҳсилу дастовардҳои назарраси ӯ қисса менамояд.
Ҷавони хушзеҳну қобилиятнок Исмоилов Муродҷон Музаффарович 18 майи соли 1989 дар оилаи зиёии шаҳри Хуҷанд ба дунё омадааст.
Соли 1996 нахустқадами худро ба Мактаби таҳсилоти миёнаи умумии рақами 5-уми шаҳри Хуҷанд гузошта буд. Дар вақти таҳсил дар маҳфили суратгирӣ фаъолона иштирок намуда, ҳамзамон вақти холигии худро ба варзиши карате-до сарф мекард.
Соли 2006 дар озмуни “Беҳтарин иншонавис”, ки аз ҷониби ташкилоти Швейтсария гузаронида шуд, иштирок намуд ва иншонависи беҳтарин дониста шуда, бо роҳхат ба урдугоҳ (лагер)-и фароғатӣ сарфароз гардид.
Дар синфи 11 аз рӯи фанҳои Технологияи информатсионӣ ва физика дар олимпиадаи мактабӣ иштирок карда, ҳам аз ҳарду фан ҷойи аввалро ишғол намуд.
То хатми синфи 11 бо омӯзиши забонҳои кореягӣ ва англисӣ машғул шуд ва соли 2007 мактабро бо баҳои хубу аъло хатм кард.
Баъд аз хатми мактаб ба Донишгоҳи давлатии Хуҷанд (ДДХ) ба номи академик Бобоҷон Ғафуров ба ихтисоси “Менеҷери технологияи компютерӣ” дохил шуд. Аз он сабабе, ки ба омӯзиши забони хориҷӣ шавқи зиёд дошт, мехост забони хориҷиро азхуд кунад.
Ба қавле бахт барояш хандид ва соли 2008 аз тарафи Коллеҷи забономӯзии LCC штати Ню-Йорки Иёлоти Муттаҳидаи Амрико ба номи Муродҷон Исмоилов даъватнома расид, ки бо хушнудиву нишоти зиёд онро қаул кард.
Худи ҳамон сол аз сӯҳбати намояндагони Сафоратхонаи Амрикоро дар шаҳри Душанбе бомуваффақият гузашт ва таҳсилашро дар ИМА оғоз намуд.
Баъди се сол, яъне соли 2011 таҳсили забономӯзиро ба итмом расонд ва бо омӯзиши барномаҳои компютерӣ машғул шуд. Баъди хатми он соли 2012 ба Донишкадаи хусусии New York Institute of English and Business дохил шуд.
Ҳамин тавр, донишкадаро соли 2015 бо муваффақият хатм намуд ва то ба ҳол дар штатҳои мухталифи ИМА бо таҷрибаомӯзиву коромӯзӣ машғул аст.
Муродҷон Исмоилов дар ҳақиқат яке аз ҷавонони лаёқатманд ва боистеъдоди тоҷик аст, ки давоми 9 сол инҷониб Тоҷикистонро дар Иёлоти Муттаҳидаи Амрико намояндагӣ менамояд.
Ба ҷузъ аз ИМА, ҳамзамон аз кишвару давлатҳои азиму музайяни Канада, Испания, Фаронса, Италия ва ғайраҳо дидан кардааст.
Барояш дар самти таҷибаомӯзиву коромӯзӣ дар ИМА комёбиву музаффариятҳои наву тоза таманно менамоем.
Бигзор дар Соли ҷавонон ҳамчун ҷавони қобилиятноки Хуҷанди бостонӣ ва Тоҷикистони соҳибистиқлол дар омӯзишу фаъолият ҳамеша муваффақу сарбаланд бошад.
Нет комментариев