15 ноябр мулоқоти Директори Маркази тадқиқоти стратегии назди Президенти Ҷумҳурии Тоҷикистон Хайриддин Усмонзода бо Сафири Фавқулода ва Мухтори Шоҳигарии Арабистони Саудӣ дар Ҷумҳурии Тоҷикистон Валид ибни Абдурраҳмон Ар-Решайдон баргузор гардид, ки дар ҷараёни он дурнамои амнияти кишварҳои Осиёи Марказӣ, ҳамкорӣ миёни марказҳои зеҳнӣ ва масоили муҳими байналмилалӣ мавриди баррасӣ ва арзёбӣ қарор дода шуд. Дар ин бора ба АМИТ «Ховар» дар маркази мазкур хабар доданд.
Хайриддин Усмонзода иброз намуд, ки муносибатҳои сиёсиву дипломатӣ, иқтисодию фарҳангӣ миёни Ҷумҳурии Тоҷикистон ва Шоҳигарии Арабистони Саудӣ солҳои охир беш аз пеш густурда ва мустаҳкам гардида, ҳамкории воқеии ҳарду давлат дар соҳаҳои тиҷорат, нақлиёт, маориф энергетика, саноати кӯҳӣ, кишоварзию саноат ва дигар самтҳои афзалиятнок ба роҳ монда шудааст.
Зикр гардид, ки дар доираи ҳамкорӣ миёни марказҳои зеҳнӣ баргузор намудани ҳамоишу конфронсҳои илмӣ дар соҳаҳои гуногун ҳамчун таҷрибаи амалӣ ба ҳукми анъана даромадааст. Хайриддин Усмонзода ба роҳ мондани робитаҳои илмиву таҳқиқотӣ миёни Маркази тадқиқоти стратегии назди Президенти Ҷумҳурии Тоҷикистон ва Пажӯҳишгоҳи байналмилалии эроншиносии «Расона»-и Шоҳигарии Арабистони Саудиро, ки чанде қабл дар мулоқот бо раиси ин пажӯҳишгоҳ Муҳамммад Ал-Суламӣ матраҳ гардид, мувафиқи мақсад арзёбӣ намуд.
Сафири Фавқулода ва Мухтори Шоҳигарии Арабистони Саудӣ дар Ҷумҳурии Тоҷикистон Валид ибни Абдурраҳмон Ар-Решайдон робитаҳои дӯстонаи Ҷумҳурии Тоҷикистон ва Шоҳигарии Арабистони Саудиро мусбат ҳисобида, таъкид намуд, ки рушди минбаъдаи онҳо ҷавобгӯй ба манфиатҳои ҳарду ҷониб мебошад. Ӯ хусусан рушди робитаҳои тиҷоратӣ ва иқтисодии ҳарду давлатро муҳим дониста, зикр намуд, ки зарфият ва имконияти воқеии ҳарду давлат дар ин самт пурра истифода нашудаанд. Ҷониби Арабистони Саудӣ омода аст, ки ҳамкории мутақобилан судманди сиёсиву иқтисодӣ, иҷтимоиву фарҳангиро бо Ҷумҳуриии Тоҷикистон тавсеа ва густариш диҳад.
Валид ибни Абдурраҳмон Ар-Решайдон ҳамкории густурдаи илмию таҳқиқотӣ миёни марказҳои зеҳнии ду давлатро мувофиқи мақсад шуморида, омодагии худро барои ба роҳ мондани ҳамкорӣ бо марказҳои зеҳнии Арабистони Саудӣ изҳор намуд. Сафир гуфт, ки ҷониби Арабистони Саудӣ дар татбиқи ҳамкории амалии судманд барои рушди иқтисодиёти Тоҷикистон нақши муҳим бозида метавонад.
Ҷонибҳо ба хулосае омаданд, ки барои густариш ва таҳкими минбаъдаи ҳамкории сиёсӣ, иқтисодӣ, фарҳангӣ ва маънавии Ҷумҳурии Тоҷикистон ва Шоҳигарии Арабистони Саудӣ ҳамоиши илмиеро дар сатҳи баланд доир намоянд. Дар он донишмандон ва коршиносони варзидаи ду кишвар ширкат варзида, доир ба масъалаҳои ҳамкории мутақобилаи дуҷонибаву бисёрҷониба, омилҳои таъсиррасон ба ин робитаҳо, дарёфти роҳҳалҳо ва тақвияти ҳамкории минбаъдаи миёни ду кишвар изҳори назар намоянд.
Манбаъ: АМИТ «Ховар»
Нет комментариев