Сарвазири Ҷумҳурии Тоҷикистон Қоҳир Расулзода бо сафари корӣ ба вилояти Суғд ташриф овард.
Зимни сафари корӣ Сарвазири мамлакат Қоҳир Расулзода нахуст бо рафти корҳои таҷдиду азнавсозии роҳи атомобилгарди Исфара-Конибодом-Маданият шинос шуд. Дар ин сафар Сарвазири кишварро Раиси вилояти Суғд Абдураҳмон Қодирӣ ва дигар масъулини дахлдор ҳамроҳӣ намуданд.
Бояд гуфт, ки роҳи мазкур аз 6 қитъа иборат буда, дарозии роҳи таҷдидшаванда дар марҳилаи аввал 68 км, паҳноиаш 12 метр ва дар баъзе ҷойҳо 22 метрро ташкил дода, лоиҳаи мазкур бо дастури Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, дастгирии Ҳукумати ҷумҳурӣ ва бо ҷалби сармояи хориҷӣ дар ду марҳила амалӣ карда мешавад.
Фармоишгари лоиҳа Вазорати нақлиёти Ҷумҳурии Тоҷикистон ва пудратчӣ ширкати чинии «Чайна Рейлвей групп корпорейшн» мебошад. Дар ҷараёни азнавсозиву таҷдиди роҳи Исфара – Конибодом — Маданият на танҳо ҳолати роҳҳо беҳтар ва ба талаботи байналхалқии роҳсозӣ мувофиқ карда мешавад, балки як қатор пулҳои мошингузар низ аз нав сохта ва ё барқарор мегарданд. Дар корҳои сохтмонӣ 80 дарсади кормандон аз ҳисоби сокинони маҳаллӣ интихоб шудаанд, ки ин ҳам барои таҷрибаандӯзиву омодасозии мутахассисони маҳаллӣ дар самти роҳсозӣ ва ҳам ҷиҳати беҳтар шудани сатҳи зиндагии онҳо мусоидат мекунад.
Зимни боздид Сарвазири мамлакат аз ҷараёни корҳои азнавсозии роҳ қаноатманд нашуд ва ҷиҳати суст будани суръату сифати таҷдиди роҳ ба масъулин эрод гирифт. Қоҳир Расулзода аз аҳамияти стратегии роҳи мазкур ёдовар шуда, таъкид дошт, ки он бояд тибқи меъёрҳои байналмилалӣ таъмир ва солҳои тулонӣ барои мардум хизмат расонад. Қоҳир Расулзода ба мутасаддиён дастур дод, ки бо ҷалби мутахассисони варзида сифати корҳо аз рӯи меъёрҳои байналмилалӣ баҳогузорӣ карда шуда, суръати корҳои азнавсозӣ тезонида ва таъмир дар муҳлати муқарраршуда, яъне соли 2018 ба анҷом расад.
Ёдовар мешавем, ки таҷдиду барқарорсозии роҳи мазкур бо иштироки Пешвои миллат муҳтарам Эмомалӣ Раҳмон моҳи марти соли ҷорӣ оғоз ёфта буд.
Дар идомаи сафар Сарвазири мамлакат бо рафти амалишавии лоиҳаи таҷдиду барқарорсозии НБО “Дӯстии халқҳо” дар шаҳри Гулистон аз наздик ошно шуд. Лоиҳаи мазкур бо ҷалби қарзи имтиёзнок дар ҳаҷми 74 млн доллар аз ҷониби Бонки таҷдид ва рушди Аврупо роҳандозӣ шуда, имкон медиҳад иқтидори истеҳсолии нерӯгоҳ барқарор ва аҳолии атроф дар фасли зимистон низ бо барқ таъмин карда шаванд. Нерӯгоҳи барқи обии “Дӯстии халқҳо” соли 1957 ба фаъолият шуруъ карда, наздик 7 дарсади барқи Ҷумҳурии Тоҷикистон дар он истеҳсол карда мешуд. Сарвазири кишвар мутасаддиёнро вазифадор намуд, ки корҳои барқарорсозиро то фарорасии фасли зимистон пурра ба итмом расонида, нерӯгоҳро барои фаъолият омода намоянд.
Сарвазири Ҷумҳурии Тоҷикистон Қоҳир Расулзода ҳамзамон рафти корҳои сохтмониро дар корхонаи азими саноатӣ – Комбинати металлургии Ширкати саноати кӯҳии Тоҷикистону Чин дар шаҳри Истиқлол мавриди таваҷҷӯҳ қарор дод. Бояд гуфт, ки ҷиҳати амалисозии сиёсати Ҳукумати Ҷумҳурии Тоҷикистон дар мавриди коркарди ниҳоии маъданҳои куҳӣ тадбирҳои мушаххас андешида шуда, ҳамкории Ҷумҳурии Тоҷикистон бо Ҷумҳурии мардумии Чин дар самти таъсиси корхонаҳои калони саноатӣ мисоли равшани ин гуфтаҳост.
Комбинати металлургии Ширкати саноати кӯҳии Тоҷикистону Чин дорои иқтидори коркарди 50 ҳазор тонна сурб дар як сол мебошад. Сохтмони корхона соли 2016 оғоз ёфта, то имрӯз 90 дарсади корҳои сохтмонӣ ба анҷом расонида шуда, воридот ва васлу насби хатҳои истеҳсолӣ идома дорад. Хотиррасон бояд намуд, ки комбинати металлургӣ идомаи бунёди силсилаи корхонаҳои Ширкати саноати кӯҳии Тоҷикистону Чин мебошад. Истихроҷ ва коркарди маъдани руҳу сурб чанд сол қабл дар корхонаи навбунёди Зарнисор оғоз ёфта буд ва минбаъд дар ҳамкорӣ бо шарикони чинӣ корхонаи бузурги металлургӣ бунёд мешавад. Масоҳати умумии ҳудуди корхона беш аз 70 гектарро ташкил дода, он илова ба силсилаи коргоҳҳои истеҳсолӣ, инчунин аз бинои маъмурӣ, хобгоҳ барои коргарон, ошхона ва майдончаҳои варзишию истироҳатӣ иборат хоҳад шуд.
Сарвазири мамлакат Қоҳир Расулзода зимни боздид аз суръати корҳои сохтмонӣ изхори нигаронӣ кард. Қоҳир Расулзода масъулини корхонаро дастур дод, ки суръати корҳои сохтмониро тезонида, баробар бо ин корҳои ободонию кабудизоркунии саҳну атроф ва таъмири роҳҳои ҳудуди корхонаро вусъат бахшанд.
Тибқи назардошт корхонаи металлургӣ бо усулҳои замонавии истеҳсолот бунёд ёфта, дар он ба истифодаи технологияи баландсифат, сарфаи нерӯи барқ, бехатарии экологӣ, идоракунии автоматӣ ва истеҳсоли маҳсулоти ба меъёрҳои байналмилалӣ ҷавобгӯ аҳмияти аввалиндараҷа дода мешавад. Маъдани сурб аз маъданҳои нодир ва арзишнок ба ҳисоб рафта, дар бозори ҷаҳонӣ талаботи зиёд дорад. Роҳбарияти корхона тасмим гирифтааст бо истеҳсоли ин маъдан пеш аз ҳама талаботи ҷумҳуриро қонеъ гардонида, дар идома бо истифода аз ин ашё коргоҳҳои дигари саноатиро аз ҷумла дар самти истеҳсоли аккумуляторҳо ва маҳсулоти гаҷи сохтмонӣ ба роҳ монад. Дар сурати фаъол шудани корхонаи мазкур дар навбати аввал наздик 600 нафар бо ҷои кори доимӣ таъмин мегарданд, ки аксаран коргарони маҳалли хоҳанд буд. Барои истеҳсоли сурб асосан ашёи хоми маҳаллӣ, аз ҷумла ангишт ва оҳак истифода шуда, ин маъдан дар ҳарорати беш аз 1000 дараҷа истеҳсол мегардад.
Манбаъ: Сомонаи Суғд ТҶ
Нет комментариев