Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, мӯҳтарам Эмомалӣ Раҳмон ба ҷавонон эътиқоди калон доранду доимо дастгири ҷавононанд. Аз ин лиҳоз, соли 2017-ро Соли ҷавонон эълон карда, дар Паёми худ қайд намуданд, ки ҷавонони мамлакат Ватани худро дӯст доранду барои ҳимояи он ҳама вақт омода бошанд, ҳамчун ояндасози миллат ба қадри сулҳу субот, осудагиву ваҳдат ва истиқлолият расида, шукронаи давлати соҳибистиқлолро ба ҷо оваранд.
Хизмат ба Ватан қарзи шаҳрвандии ҳар фарди Тоҷикистон маҳсуб ёфта, ҳифзи марзу бум барои ҷавонон вазифаи муқаддас аст. Бинобар ин, бояд ҷавонон ин муқаддасотро мисли гавҳараки чашм нигоҳ доранду барои ҳифзаш ҳамеша омода бошанд.
Соле ду маротиба маъракаи даъвати ҷавонписарони синни даъватӣ ба сафи Қувваҳои мусаллаҳ доир мегардад. Бинобар ин, то оғози давраи даъват корҳои тарғиботиву ташвиқотӣ гузаронида мешаванд.
Мақсади кормандони Мактаби муттаҳидаи техникии Ташкилоти мададгори мудофиаи Ҷумҳурии Тоҷикистон дар шаҳри Хуҷанд дар доираи иҷрои рисолати худ талош меварзанд, ки дар ниҳоди ҷавонон арзишҳои олии ватандорӣ ва ҳифзи содиқонаи марзу буми кишварро ҷой диҳанд.
— Мутобиқи нақшаи тасдиқгардидаи чорабиниҳои ММ ТҶММ-и шаҳри Хуҷанд бо мақсади баланд бардоштани ҳисси ватандӯстӣ, ҳувияти миллӣ ифтихор аз давлати соҳибистиқлол ва тақвият бахшидани тарбияи ватанпарастии ҷавонони синни даъватӣ аз тарафи комиссариатҳои ҳарбӣ вобаста карда шудаанд. Барои омода намудани ҷавонон барои хизмат ба Ватан-Модар дар сафҳои Қувваҳои Мусаллаҳи кишвар ва дигар сохторҳои қудратии мамлакат тайёр ҳастем, — гуфт зимни сӯҳбат муовини сардор оид ба корҳои таълиму тарбияи Мактаби муттаҳидаи техникии шаҳри Хуҷанд Садриддин Каримов.
Мактаби муттаҳидаи Ташкилоти ҷамъиятии мададгори мудофиаи шаҳри Хуҷанд низ ҷавонони синни даъватиро тарбия ва соҳибкасб намуда, ба сафи Қувваҳои Мусаллаҳи кишвар ва ҳифзи Ватан сафарбар менамояд.
Мактаб дорои якчанд синфхона мебошад. Аз ҷумла, синфхона оид ба сохт ва истифодабарии автомобил, оид ба қоидаҳои ҳаракат дар роҳ ва асосҳои ҳаракати бехатарӣ, синфҳои машқи ронандагӣ, тир, дифои ҳарбӣ, синфхонаи амалӣ — лабораторӣ оид ба хизматрасонии техникаи автомобилӣ, синф оид ба хизматрасонии техникаи автомобилӣ ва китобхона бо лавозимоти техникӣ ҷиҳозонида шудааст.
Устодони дорои таҷрибаи корӣ, соҳиби маълумоти олӣ фаъолият доранд, аз ҷумла 8 нафар муаллимон дарсҳои назариявӣ ва 10 нафар муаллим машғулиятҳои амалӣ мегузаронанд.
Дар давоми сол мактаби муттаҳидаи техникии шаҳри Хуҷанд аз комиссариатҳои шаҳру ноҳияҳои вилоят дар се ҷараён 210 нафар мутахассиси дараҷаи «С»-ро тайёр мекунад. Аз ин миқдор аз шаҳри Хуҷанд дар як сол 27 нафар касбҷӯ таҳсил менамояд. Дар ҷараёни якум — моҳи октябр 90 нафар, дар ҷараёни дуюм — моҳи январ 90 нафар ва дар ҷараёни сеюм 30 нафар таҳсил хоҳанд кард.
Ҷавононе, ки дар ҷараёни якум таҳсил доранд, барои гирифтани ҳуҷҷати ронандагии дараҷаи «С» мехонанд. Онҳое, ки дар моҳи январ таҳсил мекунанд, дар баробари соҳиби дараҷаи «С» шудан, инчунин мутахассиси ронанда-алоқачӣ мешаванд, — гуфт Fуфрон Воҳидов-муовини сардори мактаби муттаҳидаи техникии шаҳри Хуҷанд.
Дар мактаби муттаҳидаи техникии шаҳри Хуҷанд дар баробари тайёр кардани мутахассисону касбомӯзон, инчунин бо дастгирии Мақомоти иҷроияи ҳокимияти давлатии шаҳру ноҳияҳо, якҷоя бо Раёсати кор бо ҷавонон ва варзиши вилояти Суғд мусобиқаҳои картингронӣ, тирпаронӣ, дисантчии ҷавон, «авиамоделизм» низ мегузаронанд.
Манбаъ: Сомонаи Хуҷанд ТҶ
Нет комментариев