Таронаи «Оҳи дили зори ман»-и ду овозхони ҷавони тоҷик Фараҳманд Каримов ва Исмоилҷон Исмоилов дар муддати ҳамагӣ чанд моҳи охир танҳо дар пойгоҳи Ютуб беш аз 5 миллион тамошобин ҷамъ оварда, бидуни шак, сертарафдортарин таронаи тоҷикии соли 2017 дониста мешавад.
Таронаи «Оҳи дили зори ман” дар иҷрои сарояндаҳои ҷавони рэпсаро Фараҳманд Каримов ва Исмоилҷон Исмоилов, ки дар жанри омехта бо сабки рэп иҷро шудааст, ба як комёбии фавқулоддае даст ёфта, пуртамошобинтарин таронаи тоҷикии соли 2017 ба шумор меравад. Ин таронаро дар саҳифаҳои мухталиф дар пойгоҳи интернетии Ютуб дастикам 5 миллион нафар тамошо кардаанд. Танҳо дар саҳифаи «Muslim Production” дар Ютуб «Оҳи дили зори ман”-ро қариб 1,9 миллион нафар тамошо кардаанд.
Ба дунбол, ноширони мухталифе дар талоши ҷамъ кардани тамошобини бештар аз ҳисоби ин тарона ба бознашри «Оҳи дили зори ман” пардохтаанд ва шӯҳрати тарона ба ҳадде рафта, ки Фараҳманду Исмоилҷон ва нафақат онҳо қисматҳои 2, 3 ва ҳатто 4-и «Оҳи дили зори ман”-ро ба бозор баровардаанд.
Муваффақияти ин қисматҳои баъдӣ ба ҳадди нахустин тарона аз ин силсила нест, албатта. Шабакаи «Oriyoi Tojiki”, ки баъд аз ҳама ба бознашри «Оҳи дили зори ман” даст зад, дар Ютуб бар ин таронаи ҳаяҷоновари Фараҳманду Исмоилҷон клипе сохт, ки то имрӯз аз ҳисоби фақат ҳамин як клип зери 2 миллион тамошобин гирд овардааст.
Шӯҳрати таронаи ин ду сарояндаи ҷавон ҳатто болотар аз таронаҳои ситораҳои матраҳи эстрадаи муосири тоҷик аст. Аз байни ситораҳои аввал таронаи «Рӯъё”-и Садриддини Наҷмиддин то имрӯз 4,2 миллион тамошобин ва таронаи «Ҷигари ман”-аш 1,8 миллион тамошобин гирд овардаанд. Таронаи «Мамнунам”-и Зулайхо Мамадшоева 5,8 миллион тамошобин дорад, вале он аз соли 2016 аст. «Латино”-и Шабнами Сурайё зери 3 миллион ва «Дилам асир” ва «Нестӣ, нестӣ”-иаш то имрӯз якмиллионӣ тамошобин ҷамъ овардаанд.
Сирри ин муваффақияти фавқулоддаи таронаи «Оҳи дили зори ман”-ро, ки мисли вирус-тарона вирди забонҳо шудааст, касе, ҳатто муаллифонаш гуфта наметавонанд. Вале инак чанд моҳ боз аз аксари дӯконҳои фитафурӯшӣ дар Тоҷикистон бештар ҳамин тарона садо медиҳад. Ва бахусус нуқтаи авҷаш, ки Фараҳманду Исмоилҷон ин сатрҳоро мехонанд:
Оҳанги дили зори ман захми танат шавад,
Пироҳани хунини ман баро-т кафан шавад.
Рӯзе назар кунӣ ту бар санги мазори ман,
Афсӯс, наёбӣ ту марову гардӣ зори ман.
«Оҳи дили зори ман” тавре аз ин сатрҳои нақароташ ҳам бармеояд, таронаест дар бораи дарду ғуссаи ҷавони ошиқ аз ёри бевафое, ки аз вай ҷудо шудааст.
Фараҳманд Каримов ва Исмоилҷон Исмоилов ду сарояндаи ҳанӯз навроҳи эстрадаи тоҷиканд. Фараҳманд Каримов дар деҳаи Урметани ноҳияи Айнӣ ба дунё омадааст ва ҳамагӣ 21 сол дорад. Ҳарду ҳоло дар шаҳри Хуҷанд кору фаъолият доранд.
Фараҳманд ва Исмоилҷон аз он насли нави сарояндагони тоҷиканд, ки бо фанновариҳои навин ошноии хубтаре доранд ва ҳарду дар пойгоҳи Ютуб канали худро доранд, ки ҳар сари чанд вақт аз студия бо мухлисони худ мустақим сӯҳбат ва барояшон зинда тарона иҷро мекунанд, яъне кореро анҷом медиҳанд, ки имрӯз ба ин пеша ютубер ном додаанд.
Муаллифи оҳанги «Оҳи дили зори ман” Фараҳманд Каримов аст. Ӯ чанде пеш дар барномаи «Шоми дӯстон” қисса кард, ки таронаи «Оҳи дили зори ман” дар аввали соли 2017 сохтааст: «Оҳанги ин тарона чанд вақт боз дар фикру хаёли ман ҳама вақт ҷӯш мезад, ки ана ҳамин оҳанг чизеро барои ман мегӯяд.
Бо Исмоилҷон аввал номашро фикр кардем, ки чӣ гузорем – «Оҳи дили ман”, «Оҳанги дили ман” ё чӣ? Баъд ба хулосае омадем, ки номаш – «Оҳи дили зори ман” шавад. Ягон як ё ду ҳафтаи дигар барои навиштани матни суруд рафт.”
Манбаъ: Сомонаи Тоҷикистон таймс
Нет комментариев