Соҳибкори амрикоӣ Илон Маск азм дорад, ки бошгоҳи «Манчестер Юнайтед»-ро бо маблағи 4,5 миллиард фунт стерлинг харидорӣ намояд. Дар ин бора Daily Mail иттилоъ додааст.
Ба иттилои манбаъ, соҳибони феълии даста, бародарон Глейзерҳо тақрибан 6 миллиард фунт стерлинг талаб доранд. Қайд карда мешавад, ки ба иловаи харҷи бошгоҳ соҳибони нав бояд барои бозсозии варзишгоҳи “Олд Траффорд” ё сохтмони варзишгоҳи нав барои «Манчестер Юнайтед» тақрибан 2 миллиард фунт харҷ кунанд.
Қаблан пешниҳодҳо аз ҷониби ду гурӯҳи сармоягузорони Арабистони Саудӣ ва соҳибмулкони ИМА, Қатар, Чин ва Сингапур ба бародарон Глейзерҳо барои харидонии даста шуда буд.
Ҳамчунин миллиардери бритониёӣ Ҷим Рэтклифф аллакай бонкҳои сармоягузории JPMorgan ва Goldman Sachsро киро кардааст, то ба ӯ дар хариди бошгоҳи футбол кӯмак кунанд.
Ёдовар мешавем, ки дар моҳи ноябри соли гузашта оилаи Глейзер, ки аз соли 2005 ба ин тараф соҳиби дастаи “Манчестер Юнайтед” аст, нияти фурӯши бошгоҳро эълон карда буд. Маврид ба зикр аст, ки варианти сармоягузории шахсони сеюм низ баррасӣ мешавад.
Манбаъ: Варзиш-ТВ
Нет комментариев