Дар нашрияи Кумитаи андози Ҷумҳурии Тоҷикистон — ҳафтаномаи «Боҷу хироҷ» дар шумораи №9 (1364) аз 2 марти соли 2023 мақолае таҳти сарлавҳаи «Блогерон ва масоили онҳо» ба чоп расидааст, ки дар он дар рўйхати «Блогерҳои боинсоф» номи блогероне оварда шудааст, ки фаъолияташон расман ба қайд гирифта шуда, аксарашон саҳми худро дар ғанӣ гардидани буҷет мегузоранд. Дар руйхати «Блогерҳои бепарво» бошад номи онҳое оварда шудааст, ки то ҳол барои расмӣ кардани фаъолияташон ба мақомоти андоз муроҷиат накардаанд.
Дар руйхати «Блогерҳои бепарво» номи 29 нафар, ки ба соҳибкории ғайриқонунӣ машғул шуда, даромад ба даст меоранд, вале ба буҷети давлат андоз намесупоранд, дарҷ гардидааст. Беҳрӯз Зеваров (масъули гурӯҳи «Tamoshow» дар Ютуб), овозхон Мубориз Усмонов (масъули гурӯҳи «mubor1z» дар Ютуб), ҳаҷвнигор Саидҷон Идиев (масъули гурӯҳи «Шакарханд» дар Ютуб), Ҷонон Ашурова (масъули гурӯҳи «jononisher» дар Ютуб), Фаридун Саидов (масъули гурӯҳи «m_Favik.tj» дар Ютуб), Сабинҷон Нуриддинов (масъули гурӯҳи «sabinjonnofficialll» дар Ютуб), Сино Соҳибов (масъули гурӯҳи «Sinojon_sohibov» дар Ютуб), Ғолиб Мӯсоев (масъули гурӯҳи «golib_show») ва Аъзам Назриев (масъули гурӯҳи «zanjabilbro» дар Ютуб) аз ҷумлаи ин 29 нафар блогероне мебошанд, ки барои расмӣ накардани фаъолияташон мавриди интиқод қарор гирифтаанд.
Муаллифи мақола бо истинод ба Кумитаи андози Точикистон нигоштааст, ки бо вуҷуди гузаронидани корҳои назоративу фаҳмондадиҳӣ ва ирсоли огоҳиномаҳо ҷиҳати дар қайди мақомоти андоз гузоштани блогерҳо, ҳанўз ҳам ҳастанд нафароне, ки талаботи онро риоя намекунанд ва худро ба қайди давлатӣ намегиранд.
«Дар руйхати «Блогерҳои бепарво» номбаршудагон аз ҳисоби зиёд намудани шумораи обуначиён, қабули роликҳои таблиғотӣ, азназаргузаронии пранк-видеоҳо ва саҳнаҳои ҳаҷвӣ маблағҳои ҳангуфт меёбанд, яъне онҳо бидуни қайд дар мақомоти андоз ба соҳибкории ғайриқонунӣ машғуланд. Шояд чунин нафарон бо дидани номи худ дар рўзнома масъулият эҳсос карда, барои расмӣ кардани фаъолияти соҳибкориашон ба мақомоти андоз муроҷиат намоянд»,- омадааст дар мақолаи мазкур.
Дар рӯйхати «Блогерҳои боинсоф» номи 59 нафар блогерон, ки худро расман дар мақомоти андоз сабти ном карда, қариб аксарашон андозашонро сари вақт месупоранд, оварда шудааст. Тавре дар рўйхати мазкур омадааст, Рафаэл Гулов соли 2022 барои фаъолияти блогериаш 27 ҳазору 600 сомонӣ андоз пардохтааст. Ҳамин тавр, блогерҳо Умеда Парсаева 22 ҳазору 900 сомонӣ, Шоира Пулатова 3 ҳазору 900 сомонӣ, Мансурҷон Нигматов 27 ҳазору 700 сомонӣ, Сафина Ғоибова 20 ҳазору 600 сомонӣ, Гулноза Мирова беш аз 10 ҳазор сомонӣ ва Диловар Сафар 1500 сомонӣ ба хазинаи давлат фоида расондаанд.
Мавриди ёдоварист, ки ширкатҳои бонуфузи ҷаҳон чун «Google Comerce Limited»- шабакаи иҷтимоии «YouTobe» яке аз зерширкатҳои он аст, «Meta Platforms Ireland Limited», ки шабакаҳои иҷтимоии «Facebook», «Instagram» ва паёмрасони «WhatsApp» тобеи он мебошанд, «Apple», «Netflix», «Amazon» ва «Microsoft» барои фаъолият дар ҷумҳурии мо андоз месупоранд.
Дар баробари ин, ҳоло дар Тоҷикистон даҳҳо нафар дар шабакаҳои иҷтимоии «YouTube» ва «Instagram» саҳифаҳояшонро фаъол карда, ба таҳияи саҳнаҳои хурди ҳаҷвӣ, мусоҳибаҳо, намоиши гӯшаҳои хушманзараи Тоҷикистон, даъвати ёрӣ ба дармондагон ва ғайраҳо машғул буда, бо ин роҳ даромад мегиранд ва тибқи қонунгузории соҳаи андози мамлакат бояд андоз супоранд.
Тибқи иттилои Кумитаи андоз, ҳоло ҳар семоҳа блогерон даромадашонро ба кумита пешниҳод мекунанд ва дар умум 7 фоиз андоз месупоранд. Масалан, агар блогер дар се моҳ 10 ҳазор сомонӣ даромад дошта бошад, 700 сомонӣ андоз месупорад.
Манбаъ: АМИТ «Ховар»
Нет комментариев