Ба ин оила авлоди васеъ паҳншудаи пиёз дохил мешавад, ки қариб 500 намудро дарбар мегирад. Пиёз дар дашту нимбиёбонҳо, доманакӯҳҳо ва миёнакӯҳҳо паҳн шудааст. Намудҳои гуногуни пиёз дар нишебиҳои серсангу регӣ, дар теппаҳо, дашту мағзорҳо, зери дарахту буттаҳо аз баландии 450 м то баландии 4500 м аз сатҳи баҳр вомехӯранд. Аломати хоси пиёз доштани буйи тези махсус аст, ки он ба мавҷудияти равғани эфир вобаста аст. Пиёз дорои пояи кӯтоҳ буда, решаҳояш дар қабати на он қадар чуқури хок воқеъ аст.
different onions on wood
Пиёзаки пиёз паҳн, гирдаи дарозрӯя, гирд буда, рангаш сафед, зард, бунафш мешавад. Барги пиёз борики найчамонанд ё паҳни тасмашакли рангаш сабз ё сабзӣ хираранг буда, бо мумпарда пушида шудааст. Дарозии барги он аз 20 то 50 (60) см мерасад. Гулпоя дар соли дуюми парвариш ба вуҷуд омада, шаклаш дукмонанд мебошад ва то 1,5 м қад мекашад. Сохти гули пиёз ба гули дигар намояндагони оилаи занбакиҳо монанд аст. Гулҳои хурди (майдаи) пиёз дар хӯшагули чатршакли оддӣ ҷойгир шудаанд.
Хӯшагул то давраи гулшукуфташ бо ғилофи аз 1 ё 2 барги пушиш таркибёфта иҳота шудааст. Гулпӯши гули пиёз аз 6 гулбарги рангаш сафед, сабзтоб, бунафш ё гулобӣ иборат аст. Гардбаргҳо низ 6-то буда, асоси поячаи онҳо васеъ гардида, қисман бо ҳам пайвастанд. Гардолудшавии гули пиёз ба туфайли ҳашарот амалӣ мегардад. Меваи он ғузаи секирра ё сепалла аст, ки аз 4 то 6 тухм дорад. Тухмҳо секирраи сиёҳ мебошанд. Пиёз растании ба сармо тобовар буда, тухмаш дар ҳарорати 3-5°С неш мезанад ва дар ҳарорати 19-25°С нағз сабзида, пиёзакаш ба воя мерасад.
Нет комментариев