Олими ҷавон Махсуд Саидаминов бо ду кашфиёти нодираш дар илми химия дар доираҳои илмии ҷаҳонӣ ҳамчун як олими ояндадор эътироф шудааст. Махсуд Саидаминов, ки ҳоло дар Донишгоҳи Торонтои Канада кор мекунад, аз ангуштшумор олимони тоҷик аст, ки мақолаҳои илмиаш дар маҷаллаҳои мӯътабари «Nature» ва «American Chemical Society» чоп шудаанд. Махсуд Саидаминов, олими ҷавони тоҷик зодаи шаҳри Исфара ва дастпарвари литсейи маъруфи Абдулҳафиз Азизов, хушномтарин устоди фанни химия дар Тоҷикистон мебошад.
Манбаи акс сомонаи невс.тч
Махсуд Саидаминов ҳамагӣ 29 сол дорад, вале алакай дар доираҳои ҷаҳонии илми химия як олими ҷавони умедбахш дониста мешава. Ӯ бо беш аз 40 гурӯҳи илмии пешқадами байналмилалӣ, аз ҷумла бо гурӯҳҳои илмии донишгоҳҳои Оксфорд, Нотрдам, Торонто, MIT (ИМА), ЕTH (Сюрих, Шветсария) ҳамкориҳои зич дорад.
Сабаби чунин таваҷҷӯҳ ба ин олими тоҷик кашфиётҳои илмии ӯст.
Манбаи акс сомонаи невс.тч
Махсуд Саидаминов аз ҷумла нахустин шуда, ҳалшавии баракси перовскитҳоро дар маҳлулкунандаҳои гуногун муайян кард ва дар асоси ин кашфиёт роҳи ҷадиди кристалликунонии перовскитҳоро кашф кард. Ин кашфиёт, ки баро такмили батареяҳои офтобӣ муҳим аст, ҳоло аз ҷониби гурӯҳҳои илмии пешқадами дунё истифода мешавад. Кашфиёти дигари ин олими ҷавони тоҷик сорбенти магнитии нафт аст, ки дар ҷамъоварии маводи нафтии дар пайи садамаҳо ба дарёву кӯл ва баҳру уқёнус рехта зарур мебошад. Як грамм сорбенти кашфкардаи Махсуд Саидаминов барои аз об ҷудо кардани то 80 грамм нафт кофист. Ин кашфиёт бахусус дар пасманзари фалокатҳои экологие, ки ҳангоми истихроҷи нафт аз умқи баҳру уқёнус зиёд рух медиҳанд, аҳамияти бакарат касб мекунад. Махсуд Саидаминов ҳоло ҳамроҳи ҳамсараш Нозанин ва писараш Амир дар шаҳри Торонтои Канада зиндагӣ мекунад, чунки дар ибтидои соли 2017 барои кор дар Донишгоҳи Торонто даъват шуд. Ҳукумати Канада имсол аз байни беш аз 1000 довталаб ин олими ҷавони тоҷикро дар қатори 23 олими ҷавони дунё бо ҷоиза дар доираҳои илмӣ мӯътабари Бантинг сарфароз гардонд. Махсуд Саидаминов 23 марти соли 1988 дар оилаи олими шинохта профессор Исматбой Саидаминов ба дунё омада, соли 2005 литсейи рақами яки шаҳри Исфараро, ки бо номи Литсейи Абдулҳафиз Азизов машҳур аст, бо медали тило хатм кардааст. Махсуд Саидаминов дар солҳои таҳсил дар литсейи Азизов се дафъа – солҳои 2003-2005 – дар олимпиадаҳои ҷумҳуриявӣ аз фанни химияи медали тило ба даст оварда, соли 2005 дар олимпиадаи байналмилалии Менделеев соҳиби ҷои сеюм ва медали биринҷӣ шуда буд. Ба ин далел, ба Махсуд Саидаминов соли 2005 стипендияи президентӣ доданд. Махсуд Саидаминов соли 2005 ба факултаи химияи Донишгоҳи давлатии Маскав дохил шуда, соли 2010 ин донишгоҳро низ бо дипломи сурх хатм кард ва дар ҳамин ҷо рисолаи номзадиашро ҳимоят кард. Ӯ ҳангоми таҳсил дар Маскав низ сазовори стипендияи президенти Русия шуда буд. Махсуд Саидаминов солҳои 2013 -2016 дар Донишгоҳи илмӣ- технологии ба номи Малик Абдуллоҳи кишвари Арабистони Саудӣ ҳамчун «Postdoc” — докторант фаъолият дошт. Ва аз моҳи январи соли 2017 дар Донишгоҳи Торонтои Канада, яке аз мактабҳои олии мӯътабари дунё ба ҳайси корманди илмӣ ба кор пардохтааст.
Манбаъ аз сомонаи Тоҷикистон таймс
Нет комментариев