Овозхон мегӯяд, дар марҳилаи аввали озмуни Eurovision 2018 муваффақ шудаасту ҳоло ба вай дастгирии ҳамватанонаш зарур аст. Овозхони ҷавон Тахмина Ниёзова номзадии худро дар озмуни Eurovision 2018 пешбарӣ кардааст. Дар ин бора худи ҳунарманд ба Sputnik Тоҷикистон хабар дод. Овозхон дар ин озмун аз номи кишвари Аврупоии Сан-Марино ширкат хоҳад кард.
Тахмина мегӯяд, Сан-Марино дар интернет барои интихоби намояндааш дар Eurovision 2018 озмун эълон кард ва ӯ низ бахти худро санҷиду аз давраи аввали он гузашт.
«Ман давраи интихобиро гузаштаам. Акнун бояд ҳамчун овозхон дар вебгоҳи озмун, ки он ҷо суруди ман аст, писанди бештареро ҷамъ оварам», — мегӯяд вай.
Ба гуфтаи овозхон, дар сурати ба даст овардани писанди бисёр вай ба даҳгонаи беҳтарин овозхонҳои Сан-Марино ворид хоҳад шуд ва рақобатро барои ширкат дар Eurovision 2018 идома хоҳад дод.
Вай афзуд, созмондиҳандагони Eurovision дар Сан-Марино гуфтаанд, ки ҳарчанд пеш аз ин номи кишвари Тоҷикистонро нашунида буданд, вале фикр мекунанд, ки эҳтимоли ин ки Тахмина Ниёзова Сан-Мариноро дар Eurovision 2018 муаррифӣ кунад, бисёр аст.
«Ман фикр мекунам, ки ширкати як тоҷикдухдар дар озмуни байналмилалии Eurovision номи Тоҷикистонро барои ҷаҳониён ошнотар хоҳад кард», — мегӯяд вай.
Тахмина Ниёзова хабар дод, ки бо таронаи машҳури Селин Дион «Surrender» номзадии худро ба озмуни миллии Сан-Марино барои интихоби намояндаи ин кишвар дар Eurovision 2018 пешниҳод кардааст.
Тахмина Ниёзова нахустин овозхон аз Тоҷикистон аст, ки барои ширкат дар озмуни Eurovision азм кардааст. То кунун ҳеч намояндаи Тоҷикистон дар ин сабқати беҳтарин овозхонҳои Аврупо ҳузур пайдо накардааст.
Озмуни Eurovision 2018 моҳи май дар Лиссабон, пойтахти Португалия баргузор хоҳад шуд.
Сан-Марино, ки як кишвари хурд дар Аврупост, барои интихоби намояндааш ба Eurovision 2018 бо таъсиси сомонаи вижаи www.1in360.com озмуни саросариеро дар Интернет эълон кард, ки дар он беш аз 350 овозхону гурӯҳҳои ҳунарӣ аз саросари ҷаҳон ширкат карданд.
Манбаъ: cсомонаи sputnik-tj.com
Нет комментариев