Чанд рӯз қабл дар Маркази фарҳангии Макаои Ҷумҳурии Мардумии Чин барномаи консертии ансамбли «Дилнавоз»-и шаҳри Хуҷанд ба таври зинда ва дар сатҳи баланди касбӣ баргузор гардид. Барномаро саҳнае, ки мониторҳои он бо ангораву нақшу нигори миллии тоҷикӣ ороиш ёфта буд, ҷолибтару рангинтар намуд. Дар ин консерт аз мақомоти давлатии Макао ва корпусҳои дипломатии муқими кишвари иқомат, ҳамчунин бо назардошти он ки ин кишвар аз нигоҳи сайёҳӣ рушд кардааст, сайёҳон низ ширкат варзиданд. Ҳунарнамои ҳунармандони тоҷик аз ҷониби тамошобинон ва созмондиҳандагони фестивал хеле хуб пазируфта шуд. Ёдовар мешавем, ки аз 20 то 27 ноябр дар минтақаи маъмурии махсуси Ҷумҳурии Мардумии Чин Фестивали байналмилалии мусиқӣ баргузор гардид. Дар ҷашнвора ансамблҳои созҳои миллии Тоҷикистон, Германия, Россия, Муғулистон, Сингапур, Ҳиндустон, Гонконг, Қазоқистон ва кишвари мизбон ширкат намуданд. Тоҷикистонро дар ин Фестивали байналмилалии мусиқӣ ансамбли созҳои миллии «Дилнавоз»-и шаҳри Хуҷанд муаррифӣ намуд. Фестивал 22 ноябр бо барномаи муштараки кишварҳои иштирокчӣ дар майдони Маҷмааи таърихии «Паолои муқаддас» оғоз гардид. Зимни ин сафар дар Маркази фарҳангии Макао дарси маҳорат бо иштироки ҳайати ҳунарии Тоҷикистон доир гардид, ки зимни он ҳар як сози мусиқии миллии тоҷикӣ ба ширкаткунандагони фестивал муаррифӣ гардид. Ҳамзамон миёни ҳунармандони тоҷик ва иштирокчиён табодули афкор ва таҷриба сурат гирифт, ки ин барои тарғиби мусиқии миллии тоҷик ва сатҳи касбии санъаткорон хеле муфид аст. 27 ноябр Фестивал бо консерти оркестре, ки аз ҳисоби мутрибони кишварҳои иштирокчӣ таъсис ёфта буд, ба анҷом расид.
Манбаъ: сомонаи расмии АМИТ «Ховар»
Нет комментариев