Тибқи маълумотҳои дастрасшуда ҳаҷми истеҳсоли маҳсулоти саноатӣ дар вилояти Суғд дар ёздаҳ моҳи соли 2017 ба нӯҳ миллиард сомонӣ баробар шуд, ки бо нархҳои амалкунанда нисбат ба ҳамин давраи соли гузашта 2,8 миллиард сомонӣ ё 1,5 маротиба зиёд аст. Тибқи Озифхон Шарифзода, мудири шуъбаи энергетика ва саноати Мақомоти иҷроияи ҳокимияти давлатии вилояти Суғд танҳо дар моҳи ноябри соли равон корхонаҳои саноатии вилояти Суғд ба маблағи 1 миллиард сомонӣ маҳсулот истеҳсол кардаанд ва ин нишондиҳанда нисбат ба моҳи ноябри соли гузашта 295 миллион сомонӣ ё 1,4 маротиба зиёд аст. Ҳамин тариқ, дастури Раиси вилояти Суғд Абдураҳмон Қодирӣ ҷиҳати ба 1 миллиард доллари ИМА расонидани ҳаҷми истеҳсоли маҳсулоти саноатӣ пеш аз муҳлат иҷро карда шуд, — таъкид намуд Озифхон Шарифзода. Хотиррасон бояд кард, ки моҳи январи соли равон Раиси вилояти Суғд Абдураҳмон Қодирӣ зимни нишастӣ матбуотӣ ба хабарнигорон иттилоъ дода буд, ки бо истифода аз иқтидорҳои истеҳсолӣ ҳаҷми истеҳсоли маҳсулоти саноатӣ дар соли 2017 то ба 1 миллиард доллари ИМА расонида мешавад. Дар вилояти Суғд наздик 600 корхонаи саноатӣ фаъолият дорад. Танҳо дар соли ҷорӣ 83 корхонаи нави саноатӣ ба истифода дода шуд, ки дар онҳо 1463 нафар бо ҷойи кор таъмин гардиданд.
Манбаъ: сомонаи расмии АМИТ «Ховар»
Нет комментариев