Рӯзи гузашта, дар бинои Раёсати беҳдошти замин ва обёрӣ тибқи нақшаи мақомоти иҷроияи ҳокимияти давлатии вилоят нишасти матбуотии якҷояи Раёсати ҳифзи  муҳити зисти вилояти Суғд, Муассисаи давлатии хоҷагии ҷангал ва Раёсати беҳдошти замин ва обёрӣ дар вилоят доир гардид. Дар он рӯзноманигорон оид ба ифлосшавии дарёи Сир ва андешидани чораҳо аз тарафи мақомоти ҳифзи муҳити зист, мақсади тартиб додани шиносномаи экологии шаҳру ноҳияҳо ва вилоят, муаммоҳои экологӣ, аз ҷумла ҳолати партовгоҳҳои радиофаъол, чаронидани чорво дар ҳудуди шаҳри Хуҷанд ва соҳили дарё, оид ба андешидани чораҳои маъмурӣ барои сӯзонидани хазон, шумораи қонуншиканиҳо дар самти ҳифзи захираҳои моҳӣ дар соли сипаришуда, дар бораи китоби растаниҳои нодири вилоят, муаммоҳои ҷамъоварӣ ва нигаҳдории фурӯзонакҳои каммасрафи корношоями симобдор, оид ба ифлос кардани обанбори Қайроққум бо партовобҳо ва ҳолати хатти ташноби ш.Қайроққум саволҳо дода, посухҳои муфассал гирифтанд. Дар нишасти матбуотӣ ба ғайр аз роҳбарони сохторҳо, инчунин муовинон, сардорони шӯъба ва мутахассисони соҳа низ иштирок дошта, ба баъзе саволҳои рӯзноманигорон маълумотҳои мушаххас доданд. Дар ин бора аз Раёсати ҳифзи муҳити зисти вилояти Суғд иттилоъ доданд.