Бахшида ба Рӯзи энергетикаи тоҷик, ки ҳамасола 22 декабр таҷлил мешавад, дар идораи Шабакаҳои барқии шаҳри Хуҷанд ҷамъомади тантанавӣ баргузор гардид. Мудири шӯъбаи энергетика ва саноати Мақомоти иҷроияи ҳокимияти давлатии вилояти Суғд Озифхон Шарифзода табрикоти Раиси вилояти Суғд Абдураҳмон Қодирӣ ба муносибати Рӯзи энергетикҳоро ба самъи ҳозирин расонд. Таъкид гардид, ки рушди имрӯзу фардои тамоми соҳаҳои иқтисоди миллӣ аз истифодаи боигарии асосии мамлакатамон, яъне захираҳои гидроэнергетикӣ вобастагии бузург дорад. Раиси шаҳри Хуҷанд Маъруф Муҳаммадзода низ энергетикҳоро бо иди касбиашон таҳният гуфта, аз ҷумла таъкид сохт, ки маҳз дар замони Истиқлолият бо ибтикор ва ҳидоятҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон фаъолияти Шабакаҳои барқии шаҳри Хуҷанд инкишоф ёфта, бори аввал дар Тоҷикистон низоми биллингӣ дар соҳаи энергетика роҳандозӣ карда шуд ва он бо муваққият анҷом ёфт. Ин лоиҳа имкон дод, ки тамоми таҷҳизоти барқрасонии шабакаҳои барқии шаҳри Хуҷанд таҷдиду азнавсозӣ шуда, талафоти неруйи барқ паст ва шиддатнокӣ беҳтар карда шуд. Дар анҷоми чорабинӣ ба як қатор пешқадамони соҳа тӯҳфа ва сипосномаҳо тақдим карда шуд.
Манбаъ: сомонаи расмии МИҲД-и вилояти Суғд
Нет комментариев