Бино ба омори расмӣ, дар Ҷумҳурии Тоҷикистон ҳаштод нафар куҳансолони синнашон аз 100 боло зиндагӣ мекунанд. Панҷоҳ нафари ин дарозумрон занон ва танҳо 30 нафарашон мардон мебошанд.
Вале дар Тоҷикистон шаҳрвандоне, ки беш аз 120 сол доранд, яъне шоҳиди се аср бошанд, ангуштшуморанд. Яке аз онҳо қаҳрамони мо Фотима Мирзоқулова мебошад, ки Худо умрашро боз ҳам дароз кунад, ба наздикӣ, аниқтараш 13-уми марти соли 2018 ба синни мубораки 125 мерасад.
Фотима Мирзоқулова дар деҳаи Даҳанаи ҷамоати шаҳраки Шайдони ноҳияи Ашт умр ба сар мебарад, ки наздик 125 сол дорад ва шоҳиди се асру се давраи таърихӣ — Русияи подшоҳӣ, Иттиҳоди Шӯравӣ ва Тоҷикистони соҳибистиқлол мебошад.
Роҳатой Қобилова — духтари 78-солаи Фотима Мирзоқулова мегӯяд, ки модараш 13-уми марти соли 1893 дар деҳаи Қаҳрамон, собиқ Булоқи ноҳияи Ашт ба дунё омада, бо сокини деҳаи Даҳана оиладор шудааст ва минбаъд дар ҳамин деҳа зиндагияшро идома додааст.
Фотима Мирзоқулова сокини 125-солаи ноҳияи Ашт шояд куҳансолтарин шаҳрванди Тоҷикистон бошад. Бо вуҷуди солхӯрда буданаш очаи Фотима худ роҳ гашта метавонад ва аз саломатияш шикояте надорад. Ӯ давраҳои ҷавонияшро ба хотир оварда мегӯяд, ки дар кандани канали Фарғона кор кардааст.
Бибии Фотима ҳатто ҳамдеҳаи қаҳрамонаш Тӯйчӣ Эрйигитовро низ ба хубӣ дар ёд дорад. Тӯйчӣ Эрйигитов, ки дар Ҷанги Бузурги Ватанӣ кушта шуд, барои корнамоиҳояш сазовори унвони Қаҳрамони Иттиҳоди Шӯравӣ шудааст.
Вақте аз дӯстони давраи кӯдакияш пурсидем, бибии Фотима гуфт, ки ҳамаи онҳо барвақт аз олам чашм пӯшиданд. Ин пири барнодил ба чунин синну сол расиданашро аз зиндагии хуби худашва фарзандону наберагонаш медонад.
Бибии Фотима ҳоло дар хонаи духтари дуюмаш Роҳатой Қобилова зиндагӣ дорад. Набераву абераҳояш мегӯянд, ки зуд-зуд ба хабаргирии модаркалонашон меоянд, зеро ба синну соли модаркалон расидан орзуи ҳамаи онҳо мебошад.
Муҳаммад Қобилов — набераи 37-солаи бибии Фотима, ки дар деҳаи Даҳана бо соҳибкорӣ машғул мебошад гуфт, ки модаркалонаш соҳиби 8 фарзанд аст.
«Танҳо се фарзанди калонии модаркалонам, духтари калонии ӯ Ойсулу 90 сол, писараш Рӯзибой 86 сол ва фарзанди сеюмаш, яъне модари ман Роҳатой 78 сол доранд. Модаркалонам соҳиби 56 набера ва зиёда аз 180 абера мебошанд. Чабера низ доранд, аммо шумораи онҳоро дақиқ намедонам,» — бо табассум илова намуд Муҳаммад Қобилов.
Роҳатой Қобилова мегӯяд, ки модараш хуб хоб меравад ва роҳ гаштану хӯрок хурданаш низ хеле хуб аст. Ӯ бо табассум нақл кард, ки «боре бемор шудам ва модар-гӯён садо кардам, модарам чунон хоб рафта буд, ки садои маро нашунид. Ӯ хоби хуб меравад, ман бошам, баръакс».
Бибии Фотима шукрона аз осудагии диёр мекунад ва ба мардуми шарифи Тоҷикистон таманно дорад, ки ҳар яки онҳо ба синну соли ӯ расанд.
Воқеан, Фотима Мирзоқуловаи 125-сола – шоҳиди се аср ва се давраи таърихӣ мебошад.
Барои бибии Фотима тани сиҳату хотири ҷамъ ва дили шоду хонаи ободро таманно менамоем!
Нет комментариев