Дар давоми соли 2017-ум нақшаи қисми даромади буҷети давлатии шаҳри Хуҷанд (бе назардошти андози иҷтимоӣ) ба андозаи 102,0 фоиз таъмин гардида, ба буҷет 342,5 млн. сомонӣ ворид шуд, ки нисбат ба нақшаи тасдиқгардида (335,8 млн. сомонӣ) 6,7 млн. сомонӣ ва нисбат ба ҳамин давраи соли 2016 ба маблағи 32,3 млн. сомонӣ зиёд мебошад.
Бояд қайд намуд, ки дар ин давра ба буҷети маҳаллии шаҳр ба ҷои 134,5 млн. сомонии пешбинигардида 136,7 млн. сомонӣ ворид гардид, ки ин аз нақша 2,2 млн. сомонӣ ё 1,6 фоиз зиёд ва дар муқоиса ба ҳамин давраи соли 2016 ба маблағи 16,1 млн. сомонӣ афзудааст. Аз тарафи мақомоти дахлдори шаҳр доир ба масъалаҳои мақсаднок ва самаранок истифода бурдани маблағҳои буҷетӣ чораҳои амалӣ андешида шуда, нақшаи қисми хароҷоти буҷети маҳаллӣ бо тағйироташ дар ин давра 152,1 млн. сомонӣ буда, иҷроиш 146,0 млн. сомониро ташкил намудааст. Аз нақшаи 11 намуди андозҳо 10 намуд пурраю барзиёд таъмин гардида, 1 намуд (андоз аз даромад) таъмин нагардид, Бояд тазаккур дод, ки нақшаҳои буҷети умумӣ ва маҳаллии шаҳр пурраю барзиёд таъмин гардид ва ҳамзамон бақияи қарзи андоз нисбат ба аввали сол 2,2 млн. сомонӣ, ё 8,7 фоиз кам шудааст.
Аз қисми хароҷоти буҷети маҳаллӣ музди меҳнати корхонаву муассисаҳои буҷетӣ сари вақт пардохт гардида, қарздории фонди музди меҳнат ва қафомонии пардохти он ба назар намерасад.
Қобили зикр аст, ки дар шароити ташаккулёбии иқтисоди бозоргонӣ ва дар натиҷаи фаъолияти пурмаҳсули ҳамаи соҳаҳои истеҳсолию ғайриистеҳсолӣ ҳамчун ҳадафҳои стратегӣ ҳамарӯза беҳтар кардани раванди иҷроиши буҷет ва ислоҳоти андоз тақвият меёбад, ки он ба ислоҳоти идоракунии молиявии давлат, шаффофият, самаранокӣ ва иҷрои қатъии қисми даромади буҷет равона мешавад. Татбиқи амалии ин ҳадаф собит менамояд, ки дар шаҳри Хуҷанд баҳри муҳайё намудани зиндагии шоистаи шаҳрвандон аз тамоми имконот ва сарчашмаҳо истифода бурда мешавад.
Манбаъ: сомонаи расмии МИҲД-и шаҳри Хуҷанд
Нет комментариев