Ба Ширкати холдингии саҳҳомии кушодаи «Барқи Тоҷик»- Шабакаҳои барқи шаҳри Хуҷанд аз ҳаштуми январ то ёздаҳуми январи соли ду ҳазору ҳаждаҳум беш аз панҷсад нафар муштариён оид ба афзудани қимати истифодабарии нерӯи барқ муроҷиат намуданд. 216 ариза баррасӣ ва дар ин бора санадҳои дахлдор тартиб дода шудаанд. Шаҳрвандон аз муроҷиати хеш қонеъ гардиданд.
Дар сӯҳбат ба мо Сардори Шабакаҳои барқи шаҳри Хуҷанд Рустам Пӯлодов гуфт, ки барои саривақт баррасӣ намудани муроҷиати шаҳрвандон аз ҳисоби мутахассисони Шабакаҳои барқи шаҳр гурӯҳи корӣ таъсис дода шуд. Ҳангоми баррасии масъала ба манзили муроҷиаткунандагон рафта, кори ҳисобкунакҳо бо таҷҳизоти махсуси соҳа тафтиш карда шуда, аз рӯи истифодаи таҷҳизоти барқӣ дар манзилҳо истифодаи воқеии қувваи барқ ҳисоб карда шуд.
Зимни мусоҳиба бо мутахассисони соҳаи барқ зикр гардид, ки барои истифодабарии
аристон — 1,5 кВт. соат,
печи гармидиҳӣ – 2,5 кВт. соат,
кандитсионер — 2,5 кВт. соат,
телевизиор — 0,2 кВт. соат
ва лампаҳои рӯшноидиҳанда – 0,3 кВт. соат барқ масраф мешавад, ки дар маҷмӯъ ба 7 кВт соат қувваи барқ баробар мешавад. Агар ин рақамро ба соати истифода, баъдан ба рӯзи истифода зам намоем, қувваи барқи истифодашудаи моҳона муайян мегардад.
Масалан: 7 кВт * 10 соат * 30 рӯз * 0,1685 = 353,85 сомонӣ (Як киловатт қувваи барқ аз 1-уми октябри соли 2017-ум 0,1685 дирам муайян шудааст). Баробари овардани ин мисолҳо танҳо дар истифодаи нерӯи барқ бояд сарфакориро риоя намуд, зеро ҳисобкунакҳои рақамии нав ҳар як киловати барқи истифодашавандаро дақиқ муайян менамояд.
Низоми биллингӣ: фоида ё зарар
Бояд гуфт, ки бори аввал дар Тоҷикистон низоми биллингӣ, яъне низоми худкор дар соҳаи энергетика роҳандозӣ карда шуд ва он бомуваффақият анҷом ёфт. Ин лоиҳа имкон дод, ки тамоми таҷҳизоти барқрасонии шабакаҳои барқи шаҳри Хуҷанд таҷдиду азнавсозӣ карда шуда, талафоти нерӯи барқ паст ва шиддатноки беҳтар карда шавад.
63 000 ҳисобкунаки барқии рақамӣ ба манзили муштариён насб карда шуд. Низоми биллингӣ аз муштариён талаб менамояд, ки бояд дар мавриди оқилонаву сарфакорона истифодабарии нерӯи барқ эҳтиёткор бошанд.
Дахолати инсон ба системаи биллингӣ, хусусан ба ҳисобкунанкҳои барқӣ ғайриимкон аст. Вале ҳолатҳои аз тарафи шаҳрвандони алоҳида ғайриқонунӣ пайваст намудани хатти ҳисобкунаки ашхоси дигар низ ба қайд гирифта шудааст, ки ин ҳолатҳо дар натиҷаи муроҷиати шаҳрвандон ошкор карда шуданд.
Системаи биллингӣ муттамарказонидашуда буда, дар ҳисобу китоби он ягон шахс дахолат карда наметавонад.
Агар аҳолии шаҳри Хуҷанд моҳи декабри соли 2016 ба маблағи 6 миллиону 887 ҳазор сомонӣ ё худ 47 миллион клв соат барқ сарф карда бошад, ин нишондод дар моҳи декабри соли 2017 ба маблағи 8 миллиону 903 ҳазор сомонӣ ё худ 52 миллиону кВт соат қувваи барқро ташкил медиҳад. Гузашта аз ин 15 фисад афзоиши нархи қувваи барқ низ аз моҳи октябри соли 2017 амалӣ карда шудааст.
Ин нуктаҳо ҳамчунин дар рафти брифинге, ки дар толори Мақомоти иҷроияи ҳокимияти давлатии шаҳри Хуҷанд бо иштироки роҳбарияти Идораи шабакаҳои барқи шаҳр доир ба воқеъияти истифодаи нерӯи барқ аз тарафи муштариён дар моҳи декабри соли 2017 доир гардид, таъкид шуд.
Сардори Шабакаҳои барқи шаҳри Хуҷанд Рустам Пӯлодов дар назди журналистон гуфт, ки яке аз омилҳои асосии ба вуҷуд омадани ҳар гуна овозаву нофаҳмиҳо байни истифодабарандагони қувваи барқ ин пеш аз ҳама зиёд истифодабарии нерӯи барқ аз тарафи аҳолӣ нисбат ба ҳамин давраи соли гузашта ва ҳамчунин сард шудани ҳарорати ҳаво дар моҳи декабри соли 2017 мебошад.
Бовар дорем, ки муштариён минбаъд нерӯи барқро сарфакорона истифода менамоянд, то дар моҳи январ низ маблағи зиёд масраф накунанд. Зеро, алҳол фасли зимистон бо сардиҳояш идома дораду талабот ба нерӯи барқ ҳамоно зиёд аст!
Медиапортали «Тироз»
Нет комментариев