Рӯзи 20 феврали соли 2018 дар толори Кохи фарҳанги ба номи Абӯабдуллоҳи Рӯдакии маркази вилоят мулоқоти иҷрокунандаи вазифаи Раиси вилояти Суғд Раҷаббой Аҳмадзода бо соҳибкорон ва сармоягузороне, ки дар қаламрави вилоят фаъолият менамояд, доир гардид. Дар мулоқот муовинони Раиси вилоят, сардорони сохторҳои дахлдори Мақомоти иҷроияи ҳокимияти давлатии вилоят, роҳбарони ташкилоту идораҳои вилоятӣ, мақомоти ҳифзи ҳуқуқ, раисони шаҳру ноҳияҳои вилоят ва намояндагони воситаҳои ахбори омма ширкат варзиданд. Қабл аз мулоқот иҷрокунандаи вазифаи Раиси вилоят Раҷаббой Аҳмадзода аз намоишгоҳи маҳсулоти корхонаҳои истеҳсолии вилоят ва ҳунарҳои миллӣ боздид намуда, бо роҳбарону мутахассисони соҳаҳои мухталиф, истеҳсолкунандагон ва ҳунармандони чирадаст суҳбати судманд доир намуд. Дар мулоқот бо соҳибкорону сармоягузорон Раҷаббой Аҳмадзода суханронии пурмуҳтаво намуда, саҳми соҳибкорони вилоятро дар таъмини рушди иқтисоди миллӣ, бахусус вилоят шоиста арзёбӣ намуд.
— Мулоқоти имрӯзаи мо дар доираи дастуру супоришҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон оид ба ташаккули минбаъдаи муколамаи озод байни мақомоти давлатӣ ва бахши хусусӣ ҷараён мегирад. Зеро, чунин муколама ба ташкили инфрасохтори лозима ва фароҳам овардани фазои созгори соҳибкорӣ мусоидат менамояд, ки ҳам бахши давлатӣ ва ҳам бахши хусусӣ аз он манфиатдор аст, — зикр дошт дар оғози суханронӣ иҷрокунандаи вазифаи Раиси вилоят. Раҷаббой Аҳмадзода ҷиҳати дастгирии сиёсати иқтисодии давлатӣ ва саҳми амиқ дар раванди пешрафти мамлакати соҳибистиқлоламон, аз ҷумла вилояти Суғд ба соҳибкорон изҳори миннатдорӣ намуда, аз дастовардҳои солҳои охир ёдовар гашт. Воқеан ҳам истифодаи самараноки захираву имкониятҳои мавҷуда, усулҳои нави пешбурди роҳбарӣ, ташаббускорӣ, мустақилият, саривақт андешидани тадбирҳои судманд ва муҳимтар аз ҳама татбиқи амалии дастуру супоришҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон имкон дод, ки вилоят солҳои охир дар соҳаҳои мухталифи хоҷагии халқ ба нишондиҳандаҳои назаррас ноил гардад. Дар соли 2017 ҳаҷми маҷмӯи маҳсулоти минтақавии вилоят ба 16,7 млрд. сомонӣ ва суръати афзоиш ба 107,1 фоиз расонида шуд, ки ҳиссаи маҷмӯи маҳсулоти минтақавӣ дар сохтори маҷмӯи маҳсулоти дохилии ҷумҳурӣ 27,3 фоизро ташкил намуд. Дар ин давра ҳиссаи соҳаи саноати вилоят дар ташаккули ҳаҷми маҳсулоти саноатии ҷумҳурӣ ба 50 фоиз расида, ба маблағи 9 миллиарду 883,1 млн. сомонӣ маҳсулоти саноатӣ истеҳсол гардид, ки баробари 131,5 фоизи нишондиҳандаи соли 2016 мебошад. Дар миқёси вилоят 84 корхонаву коргоҳҳои нав бо 1479 ҷойи нави корӣ ба фаъолият шурӯъ намуданд. Тибқи дастури Пешвои миллат бекор шудани андози 10 фоизаи фурӯш аз нахи пахта ва ҷорӣ шудани боҷи содиротӣ боиси рушди соҳа гардидааст. Таҳлилҳо нишон медиҳанд, ки содироти нахи пахта аз 27,3 ҳазор тоннаи соли 2016, то 20,9 ҳазор тонна дар соли 2017 коҳиш ёфта, баръакс содироти калобаи пахтагӣ аз 3,1 ҳазор тоннаи соли 2016, то 3,7 ҳазор тонна дар соли сипаригардида зиёд шудааст. Иҷрокунандаи вазифаи Раиси вилоят баробари зикри саҳми соҳибкорон дар рушди соҳаи саноат аз дастовардҳои кишоварзон низ изҳори қаноатмандӣ намуда, баҳри пешрафти соҳибкорӣ дар ин саммтҳои муҳим дастуру супоришҳои муфид дод.
— Кишоварзони вилоят ҷиҳати афзун намудани ҳаҷми истеҳсоли маҳсулоти рақобатпазир, ғанӣ гардонидани бозори истеъмолӣ, бештар таъмин намудани аҳолӣ бо маҳсулоти ватанӣ, баланд бардоштани боздеҳи замин ва ҳосилнокии зироатҳо, инчунин ба роҳ мондани истифодаи самараноку оқилонаи захираҳои замин ва об корҳои муайянро ба анҷом расонида, дар самти амалисозии рушди устувори соҳа ба дастовардҳои назаррас ноил гардида истодаанд, — таъкид дошт Раҷаббой Аҳмадзода. Тибқи маълумотҳои оморӣ соли гузашта ҳаҷми умумии истеҳсоли маҳсулоти соҳа дар ҳамаи шаклҳои хоҷагидории вилоят ба 7 млрд. 116 млн. 439 ҳазор сомонӣ расид, ки дар муқоиса нисбат ба соли қаблӣ ба 107,0 фоиз баробар аст. Аз ҷумла, ҳаҷми умумии истеҳсоли маҳсулот дар соҳаи растанипарварӣ 108,4 фоиз ва соҳаи чорводорӣ 102,9 фоиз таъмин карда шудааст. Дар ҷаласа зикр гардид, ки дар вилоят ҷиҳати татбиқи қарори Ҳукумати Ҷумҳурии Тоҷикистон аз 3 майи соли 2014, №295, “Дар бораи Барномаи рушди муассисаҳои таҳсилоти томактабӣ ва миёнаи умумии хусусӣ барои солҳои 2014-2020” тадбирҳои зарурӣ роҳандозӣ мешаванд. То имрӯз аз тарафи соҳибкорони ватанӣ 46 муассисаи таҳсилоти томактабии хусусӣ ва 25 муассисаи таҳсилоти миёнаи умумии хусусӣ ташкил гардида, фаъолият намуда истодаанд ва бунёди муассисаҳо ва кӯдакистонҳои хусусӣ бомаром идома дорад. Аз ҷумла, дар шаҳрҳои Хуҷанд 2 мактаби хусусӣ, Истаравшан 1 кӯдакистони хусусӣ, Исфара 1 кӯдакистони хусусӣ, ноҳияи Мастчоҳ 2 кӯдакистони хусусӣ оғоз гардида, корҳои сохтмонӣ давом ёфта истодаанд. Раҷаббой Аҳмадзода бо баррасии ин масъала таъкид намуд, ки аз ҷониби Мақомоти иҷроияи ҳокимияти давлатии вилоят ва шаҳру ноҳияҳо ба соҳибкорон ва шахсони алоҳида, ки хоҳиши бунёди муассисаҳои таълимии хусусӣ доранд, шароити зарурӣ фароҳам оварда ва ба фаъолияти онҳо ҳамаҷониба кӯмак расонида мешавад. Саҳми соҳибкорон дар рушди соҳаи тандурустӣ низ хеле назаррас буда, дар вилоят 226 муассиса ба фаъолияти хусусии тиббӣ машғул мебошанд. Дар соли 2017 аз тарафи соҳибкорони ватанӣ 27 муассисаи гуногунсоҳа фаъолияти худро оғоз намудаанд, аз ҷумла ҶДММ “Луқмони Ҳаким-2014” дар ноҳияи Бобоҷон Ғафуров, “Меҳри гиёҳ” ва “Афзал” дар шаҳри Хуҷанд, “Уромед” дар шаҳри Панҷакент, “Гиппократ-2017” дар ноҳияи Ҷаббор Расулов ба фаъолият оғоз намуданд. Иҷрокунандаи вазифаи Раиси вилоят Раҷаббой Аҳмадзода вазъи соҳаҳои савдо ва хизматрасонӣ, сайёҳӣ ва ҳунарҳои миллиро низ мавриди таҳлил қарор дода, бобати беҳтар намудани сифати кор дар ин самт ба масъулин вазифагузорӣ намуд. Аз ҷумла зикр гардид, ки сайёҳӣ яке аз соҳаҳои афзалиятноки сиёсати давлатӣ маҳсуб меёбад ва бо ибтикори Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон соли 2018 — «Соли рушди сайёҳӣ ва ҳунарҳои мардумӣ» эълон гардидааст. Бо рӯҳбаландӣ аз ин иқдом алҳол таъмиру таҷдиди иншоотҳои таърихии Қалъаи Хуҷанд ва Муғтеппаи шаҳри Истаравшан шурӯъ гардидааст, ки соли ҷорӣ пешкаши сайёҳон хоҳад гашт. Баъди суханронии иҷрокунандаи вазифаи Раиси вилоят Раҷаббой Аҳмадзода чанде аз соҳибкорони вилоят ба музокира баромада, изҳор доштанд, ки пайваста дастгирӣ ва ғамхориҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва роҳбарияти Мақомоти иҷроияи ҳокимияти давлатии вилояти Суғдро эҳсос мекунанд ва баҳри рушди кишвари азизамон саъю талош меварзанд. Ҳамзамон, соҳибкорон ба иҷрокунандаи вазифаи Раиси вилоят дархосту пешниҳодҳои худро бобати боз ҳам рушду тавсеа додани соҳибкорӣ изҳор доштанд. Раҷаббой Аҳмадзода дар фарҷоми мулоқот изҳор дошт, ки ба хотири рушди соҳибкорӣ ва таъмини истеҳсоли рақобатпазир, муҳайё намудани ҷойҳои нави корӣ, фароҳам овардани фазои хуби сармоягузорӣ дар вилоят бахшида ба 30 – солагии Истиқлолияти давлатии Ҷумҳурии Тоҷикистон озмун доир мегардад, ки ғолибони он бо Ифтихорномаи Мақомоти иҷроияи ҳокимияти давлатии вилояти Суғд ва маблағҳои пулӣ қадршиносӣ мегарданд.
Манбаъ: сомонаи расмии МИҲД-и вилояти Суғд
Нет комментариев