Сарвазири Ҷумҳурии Тоҷикистон Қоҳир Расулзода дар доираи сафари кориаш ба вилояти Суғд аз шаҳрҳои Хуҷанду Бӯстон ва ноҳияи Бобоҷон Ғафуров боздид намуд.
Бо пешниҳоди Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон соли 2018 дар кишвар “Соли рушди сайёҳӣ ва ҳунарҳои мардумӣ” эълон гардидааст. Аз ин лиҳоз, дар вилояти Суғд барои ҷалби бештари сайёҳон тадбирҳои муаасир андешида шуда, бунёди меҳмонхонаҳои замонавӣ, комплексҳои хизматрасонии соҳаи сайёҳӣ ва дигар иншооти муҳими соҳаи туризм ба нақша гирифта шудаст. Дар робита бо ин дар маркази вилоят меҳмонхонаи наву замонавие бо номи “Парламент” мавриди истифода қарор хоҳад гирифт. Ин меҳмонхонаи замонавӣ дар муҳити зебову фароғатбахш, дар канори дарёи Сир ҷойгир шуда, ба сайёҳони дохиливу хориҷӣ хизмат мерасонад.
Зимни боздиди Сарвазири мамлакат Қоҳир Расулзода ва Раиси вилоят Раҷаббой Аҳмадзода аз меҳмонхонаи “Парламент” ба шахсони масъул ҷиҳати анҷоми корҳо дастуру маслиҳатҳои муфид дода шуд. Зикр гардид, ки дар “Соли рушди сайёҳӣ ва ҳунарҳои мардумӣ” мавриди истифода қарор гирифтани меҳмонхонаи замонавӣ иқдоми хубу саривақтӣ мебошад.
Дар идомаи сафар Қоҳир Расулзода бо рафти корҳои омодагӣ ба кишти пахта дар хоҷагии деҳқонии ба номи Абдураҳим Ҷумъаеви ноҳияи Бобоҷон Ғафуров шинос гардид. Чуноне иттилоъ доданд, пахтакорони хоҷагӣ имсол дар майдони 1600 гектар пахта кишт мекунанд, ки 200 гектари он кишти зери плёнка мебошад.
Сарвазири мамлакат дар аснои суҳбат бо сокинони ноҳия аз дастовардҳои замони соҳибистиқлолӣ ва талошҳои пайвастаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати расидан ба се ҳадафи стратегӣ ёдоварӣ намуд. Қайд карда шуд, ки саҳми деҳқонон дар таъмини яке аз ҳадафҳои стратегӣ — амнияти озуқаворӣ назаррас мебошад. Бинобар ин, деҳқонону хоҷагидоронро зарур аст, ки барои руёнидани ҳосили фаровон аз ҳамаи имкониятҳои мавҷуда самаранок истифода баранд.
Мақомоти иҷроияи ҳокимияти давлатии вилоят ба бунёди корхонаҳои нави саноатӣ, ворид намудани технологияҳои наву замонавӣ ва ба ин восита афзун намудани ҳаҷми истеҳсоли маҳсулот таваҷҷуҳи махсус зоҳир менамояд. Дар ин замина, дар корхонаи ордбарории «Анҳор», воқеъ дар шаҳри Бӯстон боз як хатти дигари ордбарорӣ ба кор андохта хоҳад шуд. Зимни боздид аз ин корхона Сарвазири мамлакат ба роҳбарияти корхона ва дигар шахсони масъул дастур дод, ки ба масъалаи рақобатпазир будани маҳсулоти истеҳсолшаванда таваҷҷуҳи махсус дода шавад. Айни замон дар корхонаи “Анҳор” дар баробари орд макарон низ истеҳсол мешавад. Роҳбарияти корхона ба Сарварзири мамлакат иттилоъ дод, ки дар асоси дастуру ҳидоятҳои Сарвари давлат ҷиҳати ба роҳ мондани истеҳсоли маҳсулоти воридотивазкунанда ва зиёд намудани ҳаҷми маҳсулоти содиротӣ дар корхонаи мазкур тадбирҳои иловагӣ андешида шудааст. Баъди ба кор оғоз намудани хатти нави истеҳсолӣ чандин нафар бо ҷойи корӣ таъмин гардида, ҳаҷми истеҳсол зиёд мегардад.
Манбаъ: Хадамоти матбуоти Раиси вилояти Суғд
Нет комментариев