Бо мақсади иштирок дар тантанаҳои наврӯзии сокинони вилояти Суғд гурӯҳи 20 нафараи намояндагони аҳли зиё ва фарҳангу ҳунари вилояти Самарқанди Ҷумҳурии Ӯзбекистон ба вилоят ташриф овард.
Меҳмононро дар гузаргоҳи сарҳадии “Саразм”, воқеъ дар шаҳри Панҷакент муовини Раиси вилоят Анвар Яъқубӣ ва дигар шахсони расмӣ истиқбол намуданд.
Дар назар аст, ки меҳмонон зимни ин сафар аз мавзеъҳои таърихиву фарҳангии шаҳру ноҳияҳои Панҷакент, Истаравшан, Хуҷанд, Гулистон, Бобоҷон Ғафуров боздид намуда, дар як қатор чорабиниҳои наврӯзӣ, аз ҷумла дар чорабинии Наврӯзи ҷумҳуриявӣ, ки дар шаҳри Панҷакент сурат мегирад, иштирок намоянд.
Хотирнишон бояд кард, ки дар доираи амалишавии нуктаҳои Созишномаи байни Ҳукумати Ҷумҳурии Тоҷикистон ва Ҳукумати Ҷумҳурии Узбекистон, ки зимни мулоқоти Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Ӯзбекистон Шавкат Мирзиёев ба имзо расидаанд, санаи 20-уми март намояндагони аҳли зиё ва фарҳангу ҳунари вилояти Суғд дар чорабинии наврӯзии вилояти Самарқанд иштирок намуда буданд.
Манбаъ: Хадамоти матбуоти Раиси вилояти Суғд
Нет комментариев