Гулбаҳор Ғаффороваро тамошобини тоҷик солҳост, ки мешиносад. Ин ҳунарпеша солҳо дар театр-студияи «Хандинкамон» бонуи ягона буд ва зуд ба қалби мухлисон роҳ ёфт. Аммо солҳои охир, махсусан пас аз ба шавҳар баромадан ва рафтан аз «Хандинкамон» атрофи номи ӯ овозаҳо зиёд аст. Инак, баъди чанд соли хомӯшӣ Гулбаҳор дар ҳайати театр-студияи «Коно ва Доно» бо сафари ҳунарӣ ба Душанбе омад…
-Гулбаҳор, бозгашти дубора муборак бошад. Ин шабу рӯзҳо машғули чӣ кор ҳастед?
— Ташаккур, ҳоло ба сифати саркоргардони шуъбаи фарҳанги шаҳри Қайроқум фаъолият мекунам. Машғули корҳои эҷодӣ ва ташкилӣ ҳастам. Санаи 22 март дар шаҳри Қайроққум консерти калон баргузор кардем, дар Хуҷанд барномаи нави худро пешкаш намуда, ҳоло барои сафари пойтахт омодагӣ мебинем…
-Сабаби як муддат аз саҳна канор рафтанатон дар чист?
-Оила барпо кардам ва соҳиби фарзанд шудам. Писарчаам Абӯбакр шукр, ки 5-сола шуд. Ин сабаби канор рафтани ман аз саҳна буд.
-Шавҳаратон барои бозгашт ба саҳнаи ҳунар зид набаромад?
-Аввал зид буданд. Аммо дар охир машварат кардем, ки он кас ҳамеша бо ман хоҳанд буд. Ҳамин тавр, тӯли 2 сол эшон продюсери барномаҳои консертии ман буданд. Билохира мо якдигарро фаҳмидем.
-Шуморо ҳамчун ҳунарпеша “Хандинкамон” муаррифӣ намуд, аммо якуякбора аз ин гурӯҳ рафтед ва сабаби ин амалатон то ҳол барои мухлисон пӯшида аст…
-Сабаби аз “Хандинкамон” рафтани ман нофаҳмӣ миёни ману сарвари театр Муқимҷон Абдуфаттоев буд.
-Сулаймон Саидғозиев ҳам пас аз “Хандинкамон” ба шумо пайваст. Чаро?
—Сулаймон тӯли як сол аст, ки дигар бо “Хандинкамон” нест. Ӯ муаллими рақс буда, дар Кохи Суғдиён фаъолият мекунад. Моҳи декабро мо ҳамроҳ як консерт баргузор кардем ва ҳамин тавр ӯ хушбахтона бо мо, яъне бо “Коно ва Доно” пайваст.
-Шумо солҳо дар “Хандинкамон” якҷо кор кардед. Аммо сабаб чи шуд. ки ҳайати аввалаи он пош хӯрд?
-Дар ҳама корхонаву муассиса муносибати роҳбар бо коргар бояд хуб бошад, заҳмати коргар қадр шавад, махсусан дар муассисаи эҷодӣ. Мо санъаткорон зудранҷем. Якдигарнофаҳмӣ боис шуд, ки кормандони нахустин аз “Хандинкамон” раванд.
-Гулбаҳор, ба наздикӣ тамошобинони суғдӣ шуморо дар филми “Орзуҳои наврӯзӣ” диданд. Ин таҷрибаи нахустини шумо дар филм аст. Чӣ эҳсосот доред?
-Бале ин филм аз тарафи гурӯҳи “Коно ва Доно” наворбардорӣ шуд. Дар он бо Фатҳулло Абдуллоев, Каримҷон Ғафуров ва шавҳарам нақш бозидем. Гумон мекунам, ки таҷрибаи бад набуд. Айни замон режиссёр Муҳиддини Музаффар, ки директори “Суғдсинамо” аст, маро барои иҷрои нақш дар як фоҷиаи мазҳакавӣ даъват кард. Худо хоҳад, сабти он ба наздикӣ оғоз мешавад.
-Барои шумои ҳаҷвнигор нақш бозидан дар фоҷиа душвор нест?
-Албатта. Аммо ҳунарпеша худро дар ҳар жанр бояд бисанҷад. Дар гузашта мо ҳамроҳи Муқимҷон ва Сулаймон дар фоҷиаи фаронсавии “Матео Фалкони” нақш бозида будем, ки аз тарафи тамошобин нағз қабул шуда буд.
-То ҷое медонам, суруд ҳам месароед?
-Бале, ҳамроҳи Гулизори Роҳат суруди хориҷии “Папито”-ро ба забони тоҷикӣ сароидем. Матнашро бо хоҳиши мо Маҳками Баҳриддин омода карданд. Пеш аз ин ҳамроҳи Низомҷон Азимов дуэти “Фарбеҳаки ман”-ро иҷро кардем.
— Гулбаҳор шумо аз чӣ афсӯс мехӯред?
-Аз пошхӯрии “Хандинкамон”. Ин театр — студияро агар падараш Муқимҷон бошад, модараш ман будам. Аз оғози фаъолияташ аз соли 1997 то соли 2012 мо онро мисли тифл марҳила ба марҳила бузург кардем. Барои ҳар як модар дидани доғи фарзанд дарднок аст. Аммо чӣ илоҷ?
-Санаи 1 апрел шумо дар Душанбе барномаи консертӣ доред? Тамошобин аз ин барнома чӣ интизор шавад?
-Барномаи консертии нави театр–студияи “Коно ва Доно” саҳнаҳои нав, ҳаҷвҳои намакинро дар бар мегирад ва боварӣ дорам, ки ба тамошобин писанд хоҳад омад. Консерти мо санаи 1-уми апрел дар Филармонияи давлатии Тоҷикистон баргузор мегардад ва ман ҳамаи шуморо даъват менамоям.
Сӯҳбаторо Шаҳло Ниёзова
Чун 1-уми апрел Рӯзи ханда аст, тамоми хонандагони азизи Медиапортали «Тироз»-ро бо ин рӯзи фархунда табрик намуда, барояшон лабони пур аз табассум ва дарозумриву хонаободиро таманно менамоем!
Нет комментариев