Президенти Ҷумҳурии Тоҷикистон муҳтарам Эмомалӣ Раҳмон дар ҷараёни сафари кориашон ба вилояти Суғд дар шаҳри Хуҷанд дар як маросим ба 150 ятими кул аз ин вилоят тӯҳфаҳои наврӯзӣ тақдим карданд. Ин тӯҳфаҳо иборат аз сару либос, пойафзол ва пули нақдро шахсан худи Эмомалӣ Раҳмон ба дасти ятимони кулле, ки аз 15 шаҳру ноҳияи вилояти Суғд махсус барои мулоқот бо Пешвои миллат оварда буданд, супурд.
Пешвои миллат Эмомалӣ Раҳмон ятимонро бо иди Наврӯз табрик гуфта, ба онҳо саломатӣ, таҳсил бо баҳои хубу аъло ва ахлоқи ҳамида орзу карданд. Сарвари давлат афзуданд: «Таваҷҷуҳи давлату Ҳукумати Тоҷикистон нисбат ба таълиму тарбияи насли наврас, бахусус ятимону бепарасторон ва фарзандони оилаҳои ниёзманд сол то сол зиёд гардида, ҷиҳати фароҳам овардани шароити мусоиди таҳсил, кору фаъолият ва зиндагии мустақилонаи онҳо тадбирҳои зарурӣ андешида мешавад.”
Як лаҳзаи таъсирбахши ин мулоқот лаҳзае буд, ки духтаре бо номи Гулмира Ҳасанова аз Президенти кишвар хост, то барои дохил шуданаш ба мактаби олӣ кумак кунад. Пешвои миллат Эмомалӣ Раҳмон ин духтарро ба пеши худ хонда, сарашро сила карда, пурсиданд, мушаххасан чӣ касберо интихоб кардааст. Гулмира гуфт, ки мехоҳад ба риштаи равоншиносӣ дохил шавад.
Сарвари давлат Эмомалӣ Раҳмон дар ҳоле ки сари ин духтари ятимро сила мекарданд, гуфтанд: «Тамом. Шумо аз 1 сентябри соли равон – донишҷӯи Донишгоҳи миллӣ!”
Раисиҷумҳур ба дунбол хитоб ба зердастонашон гуфтанд, ки Гулмира Ҳасановаро дар давраи таҳсилаш бояд бо хобгоҳ низ таъмин кунанд.
Пешвои миллат Эмомалӣ Раҳмон ҳамчунин гуфтанд, то вақте ки ҳаст, намегузорад, ки ягон ятим хор шавад. «Худам тарбия мекунам ва ба воя мерасонам”, — гуфтанд раисиҷумҳур.
Манбаъ: Сомонаи расмии Тоҷикистонтаймс
Нет комментариев