Дар арафаи Рӯзи ҷавонони Тоҷикистон дар Кохи фарҳанги ба номи Абӯабдуллоҳ Рӯдакӣ мулоқоти Раиси вилоят Раҷаббой Аҳмадзода бо устодону донишҷӯёни Донишгоҳи давлатии Хуҷанд ба номи академик Бобоҷон Ғафуров баргузор гардид.
Нахуст Раиси вилоят дар даромадгоҳи Кохи фарҳанги ба номи Абӯабдуллоҳ Рӯдакӣ аз намоиши дастовардҳои устодону донишҷӯёни донишгоҳ боздид намуд.
Зимни мулоқот бо устодону донишҷӯёни донишгоҳ Раиси вилоят аз дастгириҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон нисбати ҷавонон ёдовар шуд. Зикр гардид, ки бо сиёсати маорифпарваронаи Пешвои миллат давоми солҳои соҳибистиқлолӣ шумораи муассисаҳои олӣ ва миёнаи касбӣ афзуда, ҳазорон нафар соҳибтахассус шудаанд. Дар ин радиф, саҳми Донишгоҳи давлатии Хуҷанд ба номи академик Бобоҷон Ғафуров низ дар омодасозии кадрҳо назаррас мебошад. Донишгоҳи давлатии Хуҷанд аз зумраи бонуфузтарин донишгоҳҳои олии кишвар ба шумор меравад ва дар он наздик 20 ҳазор донишҷӯён дар 76 кафедра аз рӯи 74 ихтисос таҳсил мекунанд.
Дар тӯли беш аз 85 соли мавҷудият ва фаъолияти донишгоҳ ин махзани илму маърифат ба яке аз бузургтарин ва бонуфузтарин муассисаҳои таълимӣ ва илмии мамлакат табдил ёфт. Як зумра дастпарварони донишгоҳ ҳамчун олимону донишмандони номӣ, арбобони машҳури ҳизбию давлатӣ, ҳарбӣ, дипломатҳо, адибон, рӯзноманигорони хушсалиқа, ҳунармандон, ихтироъкорону навоварон, рассомону эҷодкорони асил ном бароварда, симо ва шӯҳрату нуфузи донишгоҳро дар тамоми Тоҷикистон ва берун аз он муаррифӣ намудаанд. Академикҳо, олимони сатҳи ҷаҳонӣ, ситорашиноси номӣ Пӯлод Бобоҷонов, муаррихи мумтоз Нӯъмон Неъматов, табиатшиноси маъруф Юсуф Носиров, донишмандони машҳур Сайдулло Абдуллоев, Раззоқ Ғаффоров, нахустин доктори илмҳои фалсафа дар Осиёи Миёна Мунзифа Ғаффорова, муаррихи шинохта Ғафур Ҳайдаров, олим ва адиби номӣ Атахон Сайфуллоев, ходимони намоёни ҳизбию давлатӣ Абдулаҳад Қаҳҳоров, Рифъат Ҳоҷиев, Ибодат Раҳимова, генералҳо Қодир Ҳобилов, Абдураззоқ Юсупов, Темурҷон Раҳимбоев, дипломатҳо Абдулаким Қаюмов, Ислом Ёқубов, Низомиддин Зоҳидов, шоирону нависандагони варзидаи тоҷик Аминҷон Шукӯҳӣ, Ҳоҷӣ Содиқ, Муҳиддин Фарҳат, Абдумалик Баҳорӣ, Бурҳон Фаррух, Озод Аминзода, Фарзона, Баҳром Фирӯз, Ҳунармандони мардумии Иттиҳоди Шӯравӣ Ҷӯрабек Муродов ва Зебо Аминзода, Ҳунарманди мардумии Тоҷикистон Ҷӯрабек Набиев, Рассоми халқии ИҶШС Зулфия Баҳриддинова ва даҳҳои дигар маҳз дар ҳамин донишгоҳ парвариш ёфта, ба қуллаҳои баланди илму эҷод ва шӯҳрату эҳтиром расидаанд.
Таъкид карда шуд, ки дар даврони соҳибистиқлолӣ бо дастгирии Ҳукумати ҷумҳурӣ, Вазорати маориф ва илми мамлакат ва мақомоти иҷроияи ҳокимияти давлатии вилоят корҳои ободонӣ ва бунёдкорӣ дар донишгоҳ вусъат ёфта, иншооти гуногун, аз ҷумла маҷмааи варзишии «Хуррамшаҳр», бинои нави таълимии донишгоҳ ва бинои истиқоматии нӯҳошёна барои устодони донишгоҳ мавриди истифода қарор гирифт.
Дар Донишгоҳи давлатии Хуҷанд ба номи академик Бобоҷон Ғафуров имрӯзҳо 850 нафар омӯзгорон, ки 45 дарсади онҳо соҳиби унвонҳои илмӣ мебошанд, ба таълиму тарбияи насли ҷавон машғуланд. Раиси вилоят аз фаъолияти пурсамари устодони донишгоҳ ёдовар шуда, дастовардҳои донишҷӯёнро самараи меҳнати устодон арзёбӣ кард.
Дар идомаи мулоқот чанде аз устодону донишҷӯёни донишгоҳ сухан гуфта, барои дастгириҳои ҳамешагӣ ба Пешвои миллат муҳтарам Эмомалӣ Раҳмон изҳори сипос намуданд.
Баъд аз анҷоми мулоқот аз ҷониби Раиси вилоят ба 30 нафар донишҷӯёни фаъоли донишгоҳ туҳфаҳои молиявӣ тақдим гардид ва сипас аз ҷониби донишҷӯён барномаи фарҳангӣ пешниҳод карда шуд.
Манбаъ: Хадамоти матбуоти Раиси вилояти Суғд
Нет комментариев