Меҳрона яке аз сурудҳои машҳури Земфираро олиҷаноб сароид.
Овозхони 17-солаи тоҷик Меҳрона Ғайбуллоева ба даври нимфиналии озмуни «Ты супер!» дар шабакаи телевизионии НТВ-и Русия роҳ ёфт.
Ӯ бо иҷрои таронаи машҳури Земфира «Я искала тебя» ҷонибдории овози се ҳаками озмун — продюсери маъруф Виктор Дробиш, овозхонҳои шинохтаи рус Юлианна Караулова ва Сергей Лазаревро ба даст овард.
Дар даври аввали озмун Меҳрона таронаи Полина Гагарина «Драмы больше нет»-ро сароида буд.
Ҳамин тавр, ягона намояндаи Тоҷикистон дар озмуни байналмилалии мусиқии «Ту беҳтаринӣ!» Меҳрона ба давраи нимниҳоӣ гузашт
Баромади тоҷикдухтарро аҳли толор гарму самимона пешвоз гирифтанд. Се довар тугмаи сабзро пахш карданд.
Меҳрона худ мегӯяд, «ростӣ бовар надошт».
Ғайбуллоева дар ин давра суруди «Искала» (Меҷустам)-и Земфираро иҷро кард.
Меҳрона Ғайбуллоева пештар нақл карда буд, ки каме нотоб шуда буд, барои ҳамин бовариаш ба худаш каме коста шудааст. Аммо барои пирӯзӣ тамоми қувваи худро истифода хоҳад бурд.
«Хеле дар ҳаяҷон ҳастам. Каме нотоб шуда будам, барои ҳамин шояд аз ҳамин сабаб ба давраи дигар нагузарам. Шонси ман 50 ба 50 аст ба фикри худам», — мегуфт вай.
Меҳрона қоил мешавад, ки хеле Тоҷикистонро пазмон шудааст ва мехоҳад ба зудӣ ба кишвар бар гардад.
Дар мусоҳиба тоҷикдухтар худ гуфта буд, интихоби суруд барояш хеле мувофиқ аст.
«Ман ба ҳамаи онҳое, ки дар интихоби суруд ба ман кӯмак кардаанд, изҳори миннатдори баён мекунам. Ин тарона бароям хело мувофиқ аст»,- қайд кард вай.
Аввалин шуда, тугмаи сабзро оҳангсоз ва продюсер Виктор Дробиш пахш кард. Юлианна Караулова низ дер интизор нашуд, каме бодиққат Меҳронаро гӯш кард ва тугмаро пахш намуд.
Афзун бар ин, маҳз интихоби ин ҳунарпеша ба Меҳрона афтод ва тоҷикдухтар яке аз чор овозхонҳо шуд, ки ба давраи нимниҳоӣ дар ин бахши барнома роҳ ёфт.
Сергей Лазарев гуфт, «ҳам ҳунарнамоӣ ва ҳам нақшофарӣ ва ҳам овоз — ҳаммааш олӣ буд».
Оҳангсози машҳур ва тавоно Игор Крутой гуфт, ки каме дар сабк иштибоҳ ба назар мерасид, барои ҳамин тугмаи вай сурх монд.
Меҳрона ҳунарнамоиро ҳануз аз синфи як дар консертҳои мактабӣ шуруъ кардааст. Чанд сол пеш ҳатто бо репсарои машҳури тоҷик Master Ismail овозхонӣ кард ва фаҳмид, ки аслан аз саҳнаи бузург наметарсад, баръакс худро хеле озод эҳсос мекунад. Шуруъ аз он замон борҳо дар консертҳои шаҳрӣ ҳунарнамоӣ карда, соле пеш ҳатто дар озмуни сарояндагони ғайриҳирфаӣ — «Ориоке» барандаи ҷойи дувум шуд.
Озмуни байналмилалии овозхонии «Ту беҳтаринӣ!» ба кӯдакони боистеъдоде, ки бе нигоҳубин ва бе волидайн мондаанд, имкон медиҳад, аз худ хабар диҳанд ва саҳнаҳои бузургро тасхир кунанд. Дар мавсими дувуми озмун кӯдакону наврасон аз Русия, Белорус, Молдова, Эстония, Латвия, Қазоқистон, Узбакистон, Тоҷикистон, Арманистон, Озарбойҷон, Осетияи Ҷанубӣ ва Олмон ширкат мекунанд.
Манбаъ: Сомонаи расмии Спутник Тоҷикистон
Нет комментариев