Раиси вилояти Суғд Раҷаббой Аҳмадзода дар доираи сафари корӣ ба шаҳри Истаравшан се нафар иштирокчиёни Ҷанги Бузурги Ватаниро аёдат намуд.
Раиси вилоят зимни суҳбат бо иштирокчиёни Ҷанги Бузурги Ватанӣ аз корнамоиҳои бемисли онҳо ёдовар шуда, таъкид кард, ки дар он солҳои мудҳиш дар қатори мардумони собиқ Иттиҳоди Шӯравӣ фарзандони Тоҷикистон низ ба ҳимояи ватани хеш бархоста, барои ҳифзи хоки ватан синаи худро сипар намудаанд. Қаҳрамониву диловарии фарзандони шуҷоъи ватан дар саҳифаҳои таърих бо ҳарфҳои заррин сабт гардидааст ва давлату Ҳукумат азхудгузаштагиву ҷоннисориҳои зафармандонро қадр менамояд.
Зикр гардид, ки бо ҳидоятҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон иштирокчиёни ҶБВ таҳти таваҷҷӯҳу ғамхориҳои доимӣ қарор доранд. Раиси вилоят Акмалхон Қутбиддинов, Албена Сарапп ва Исмоил Юлдошевро аз номи Пешвои миллат муҳтарам Эмомалӣ Раҳмон ба муносибати фарорасии Рӯзи Ғалаба табрик гуфта, ба онҳо саломатии бардавом ва хушиҳои рӯзгорро таманно намуд. Дар вазъияти тантанавӣ ба ҳар кадоме аз шахсони зикршуда туҳфаҳои пулии Раиси вилоят дар ҳаҷми 1500 сомонӣ супорида шуд.
Хотирнишон бояд кард, ки имрӯзҳо дар шаҳри Истаравшан 10 нафар иштирокчиёни ҶБВ умр ба сар мебаранд. Қабл аз ин намояндагони Дастгоҳи иҷроияи Президенти Ҷумҳурии Тоҷикистон ва Мақомоти иҷроияи ҳокимияти давлатии вилоят иштирокчиёни ҶБВ аз шаҳри Истаравшанро аёдат намуда, ба онҳо аз номи Пешвои миллат муҳтарам Эмомалӣ Раҳмон ба миқдори 4 ҳазор сомонӣ ва аз номи Раиси вилоят ба миқдори 1500 сомонӣ кӯмакпулиҳо тақдим намуданд.
Манбаъ: Хадамоти матбуоти Раиси вилояти Суғд
Нет комментариев