Аз 5 то 6 майи соли равон дар Муассисаи таълимии давлатии «Мактаби байналмилалии Президентӣ»-и шаҳри Душанбе даври ҷумҳуриявии Олимпиадаи номии хонандагони муассисаҳои таҳсилоти умумӣ ва Олимпиадаи даставӣ байни хонандагони мактабҳои Президентӣ ва литсейҳо барои хонандагони болаёқат аз фанҳои табиӣ-риёзӣ баргузор гардид.
Аз Вазорати маориф ва илми Ҷумҳурии Тоҷикистон хабар доданд, дар олимпиадаҳои мазкур хонандагони муассисаҳои таҳсилоти умумии Вилояти Мухтори Кӯҳистони Бадахшон, вилоятҳои Суғду Хатлон, шаҳри Душанбе ва шаҳру ноҳияҳои тобеи ҷумҳурӣ иштирок намуданд. Тибқи талаботи Низомномаи олимпиадаҳо, супоришҳо дар шакли тестӣ ва кори хаттӣ ба роҳ монда шуданд.
Бино ба иттилои манбаъ, дар даври ҷумҳуриявии Олимпиадаи номии хонандагони муассисаҳои таҳсилоти умумӣ 236 нафар хонанда иштирок намуд. Аз ин шумора 48 нафар хонанда соҳиби ҷойҳои ифтихорӣ (11 медали тилло, 14 медали нуқра ва 23 медали биринҷӣ) гардиданд.
Инчунин, дар даври ҷумҳуриявии Олимпиадаи даставӣ байни хонандагони мактабҳои Президентӣ ва литсейҳо барои хонандагони болаёқат аз фанҳои табиӣ-риёзӣ 233 нафар хонанда иштирок карданд, ки 43 нафари онҳо соҳиби ҷойҳои ифтихорӣ (13 медали тилло, 12 медали нуқра ва 18 медали биринҷӣ) шуданд.
Ҷамъбасти даври ҷумҳуриявии Олимпиадаи даставӣ байни хонандагони мактабҳои Президентӣ ва литсейҳо барои хонандагони болаёқат нишон дод, ки дастаи хонандагони Муассисаи давлатии таълимии «Литсей барои хонандагони болаёқат» дар шаҳри Душанбе бо гирифтани 17 ҷойи ифтихорӣ (5 медали тилло, 5 медали нуқра, 7 медали биринҷӣ) сазовори ҷоизаи дараҷаи якум, Муассисаи таълимии давлатии «Мактаби Президентӣ барои кӯдакони болаёқат дар ноҳияи Данғараи вилояти Хатлон» бо гирифтани 6 ҷойи ифтихорӣ (3 медали тилло, 1 медали нуқра, 2 медали биринҷӣ) сазовори ҷоизаи дараҷаи дуюм ва Муассисаи давлатии таълимии «Литсей- интернати Президентӣ барои кӯдакони болаёқати Ҷумҳурии Тоҷикистон» бо гирифтани 4 ҷойи ифтихорӣ (1 медали тилло, 3 медали биринҷӣ) соҳиби ҷоизаи дараҷаи сеюм гардиданд.
Ғолибони олимпиадаҳои ҷумҳуриявӣ бо ҷом, медалҳои рамзӣ, ифтихорнома, туҳфаҳои хотиравии Вазорати маориф ва илми Ҷумҳурии Тоҷикистон — китоби Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон «Тоҷикон дар оинаи таърих» сарфароз гардонида шуданд.
Ҳамзамон бояд зикр намуд, ки барои иштироки фаъолона дар олимпиадаи мазкур 34 нафар хонанда бо Ифтихорномаи Вазорати маориф ва илми Ҷумҳурии Тоҷикистон сарфароз гардиданд.
Ба иттилои Вазорати маориф ва илми кишвар, хонандагоне, ки сазовори ҷойҳои 1, 2 ва 3 гаштаанд, ҳангоми супоридани имтиҳонҳои Маркази миллии тестии назди Президенти Ҷумҳурии Тоҷикистон таносубан ба 100, 75 ва 50 холи (бонус) иловагӣ сарфароз гардонида мешаванд. Дар байни иштирокдорони олимпиада 7 нафар сазовори аз 90 то 100 хол гардиданд, ки тибқи талаботи Низомномаи Олимпиадаҳо, дар сурати мувофиқат намудани фан ба ихтисос соҳиби «Тавсиянома»-и Вазорати маориф ва илми Ҷумҳурии Тоҷикистон гашта, тариқи суҳбат ба муассисаҳои таҳсилоти олии кишвар қабул карда мешаванд.
Натиҷаи ҷамъбасти олимпиадаҳои ҷумҳуриявии хонандагони муассисаҳои таҳсилоти умумӣ нишон дод, ки бо назардошти ҳамасола муҳайё гардидани шароити таълиму тарбия дар муассисаҳои таълимӣ иштироки хонандагон дар озмуну олимпиадаҳо зиёд гашта, сатҳи дониши хонандагон нисбат ба солҳои гузашта боло рафта истодааст.
Вазорати маориф ва илми Ҷумҳурии Тоҷикистон дар самти дарёфту рушди истеъдодҳо ва таҳкими ҳаракати олимпӣ мунтазам тадбирҳои судманд андешида, барои ташаккули тафаккури мантиқии хонандагон заминаи мусоид фароҳам меорад. Дар ин самт шаклҳои гуногуни Олимпиада, аз ҷумла Олимпиадаи фаннии хонандагони муассисаҳои таҳсилоти умумӣ, олимпиадаи даставии хонандагони муассисаҳои таҳсилоти умумӣ, Олимпиадаи номии хонандагони муассисаҳои таҳсилоти умумӣ, Олимпиадаи даставӣ байни хонандагони мактабҳои Президентӣ ва литсейҳо барои хонандагони болаёқат, Олимпиадаи лоиҳавӣ-ихтироъкорон дар асоси Низомномаҳо ба роҳ монда шудаанд. Имсол бо дастгирии бевоситаи Вазири маориф ва илми Ҷумҳурии Тоҷикистон Низомномаи олимпиадаҳои мазкур бо таҳрири нав қабул гардида, дастраси раёсату шуъбаҳои маорифи вилоятҳо, шаҳру ноҳияҳо гардонида шуд.
Ёдовар мешавем, ки тибқи дастуру супоришҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, Олимпиадаҳои ҷумҳуриявии фаннии хонандагони муассисаҳои таҳсилоти умумӣ шурӯъ аз соли таҳсили 2014-2015 тавассути Маркази миллии тестии назди Президенти Ҷумҳурии Тоҷикистон гузаронида мешаванд.
Манбаъ: Сомонаи расмии АМИТ «Ховар»
Нет комментариев