«Салом падарон, модарон, хоҳарону бародарон ва мухлисони азизи дилу дида. Шукри Парвардигор ва қисмат зиндаем ва боз бо ҳамем. Барои ҳунарманду эҷодкор баҳри эҷод кардану офаридан муҳимтарин чиз ин рӯҳияи хуб доштан аст», — навиштааст дар номаи пур аз самимияту ихлоси хеш сарояндаи соҳибзавқу соҳибистеъдод Дилноза Каримова.
Дар идомаи намааш Дилноза овардааст: «Аз рӯҳияи моҳҳои охири ман ҳамаи Шумо хуб хабардор будед. Шуморо бовар мекунонам, ки маҳз ҳамин муҳаббату дастгириву дар канорам буданҳои Шумо нагузошт, ки ман рӯҳану ҷисман шикаставу нопайдо гардам.
Ҳарчанд вуҷудам ғамхона шуда бошад ҳам дар ивази некиҳои Шумо амалеро дар навбати худ анҷом додан намегузорадам, ки бимирам. Маҳз дар мушкилтарин лаҳзаҳои зиндагиям қадри Шумо мухлисони азизам, қиммати ҳунару ҳунарманд буданро ба хуби дарк кардам.
Дарк кардам рисолати ягонаи худро. Сароидан! Пайваста эҷод кардану дар саҳна будан. Дар саҳна будану аз саҳна гуфтани ҳарфҳое, ки рӯҳияи мардумро шод нигаҳ дорад. Дилҳои шикастаро умед бахшад. Ғанимат будани сонияҳову одамҳоро бифаҳмонад. Ҳамеша дар дил фурӯзон нигоҳ доштани шӯълаи муҳаббатро васф бикунад.
Инак рӯзҳои боронӣ паси сар шуданд.
Шукр. Шукр мекунам аз буданатон. Шукр мекунам аз нафасеро ки Шуморо ҳамнафасам. Шукр мекунам, ки ҳанӯз дар овони кӯдаки завқи сарояндагиву оҳангсози доштани ману бародарам Зайниддинро ба инобат гирифта модари ҷонам ба мактаби мусиқӣ доданд ва заҳмати зиёд кашиданд то мо ба сарояндаву оҳангози касби табдил ёбем.
Ба шарофати раҳнамоиву дилсӯзиву серталабии он кас мо имрӯз Дилноза Каримова ва Зайниддин Каримов ҳастем. Дар пеши худ ҳамеша мақсад гузоштану софдилонаву поквиҷдонона ба мақсади худ расиданро маҳз модар дар вуҷуди мо тарбия кардаанд.
Ҷоятон ҷаннат бод Аяҷон! Мо зиндагиву мақсадҳои наҷиби шуморо идома хоҳем дод!
Зиндагӣ идома дорад, мубориза низ. Кунун нигоҳу эҳсосу маънии зиндагии ман дигаргуна хоҳад буд.
Инак пас аз рафтани модар ва фарзанд ман сароиданро идома медиҳам.
Чаро, ки САРОИДАН барои ман ЗИСТАН аст. ЗИСТАН бароям САРОИДАН аст. Ҳис мекунам, ки ба ҷуз саҳна, ба ҷуз сароидан маро чизе ором нахоҳад кард.
Инак ман месароям: барои худ барои наздикони худ ва албатта барои Шумо мухлисони азиз, ки ҳамеша бароям қуввати дил будед. Аввалин суруди худро ман ба модари азизам ва барои тамоми модарони дунё мебахшам.
Суруди нави Дилноза Каримова бо дастгирии ҳамаҷониба ва ҳамроҳи оҳангсози беҳтарин Зайниддин Каримов омода ва пешниҳоди мухлисонашон гардидааст.
Нет комментариев