25 май, дар Китобхонаи илмӣ-оммавии ба номи Тошхоҷа Асирии маркази вилоят-шаҳри Хуҷанд маҳфили адабӣ-фарҳангии «Таронасози муҳаббат» ба муносибати 95-солагии Шоири халқии Тоҷикистон Аминҷон Шукӯҳӣ баргузор гардид. Он бо ибтикори Раёсати фарҳанги Мақомоти иҷроияи ҳокимияти давлатии вилояти Суғд, Китобхонаи илмӣ-оммавии ба номи Тошхоҷа Асирӣ ва Бахши суғдии Иттифоқи нависандагони Тоҷикистон роҳандозӣ шуд.
Нахуст меҳмонону иштирокчиёни маҳфили ёдбуд — шоирону нависандагон ва олимони маъруфи кишвар, ахли фарханг, омузгорону толибилмон ва наздикону пайвандон аз намоиши китобӣ-матбуотӣ дидан намуда, вориди толори китобхона шуданд.
Ҳаёту фаъолияти ибратбахшу намунавии устод Аминҷон Шукӯҳӣ тавассути слайди омодашуда манзури ҷамъомадагон гардид.
Мусаллам шуд, ки адиби маъруф соли 1923 дар маҳаллаи Лак-лакони деҳаи Рӯмони ноҳияи Бобоҷон Ғафуров (собиқ Хуҷанд) таваллуд шудааст.
Маҳфилро сарвари китобхона Баҳром Мирсаидов ҳусни оғоз бахшида, оид ба бузургии устод Аминҷон Шукӯҳӣ сухан кард.
Раиси бахши Суғдии Иттифоқи нависандагони Тоҷикистон, Шоири халқии Тоҷикистон Аҳмадҷони Раҳматзод дар хусуси ашъори безаволи устод сухан карда, повести «Об аз куҷо меояд?»-ро намунаи беҳтарини он номид.
Намояндаи Мақомоти иҷроияи ҳокимияти давлатии вилояти Суғд Тоҷибой Султонзода бо баробари расонидани табрикоти Раиси вилоят Аҳмадҷони Раҳматзод, чанд намунаи шеърҳои баландмазмуни устод Аминҷон Шукӯҳиро қироат ва тавсиф намуд.
Шогирди вафодори устод, Корманди шоистаи Тоҷикистон, нависанда Маъруф Бобоҷон дар мавзӯи «Нақши А. Шукӯҳӣ дар ғановати барномаҳои телевизион ва радиои ҷумҳурӣ» баромад карда, солҳои роҳбарии устод дар Кумитаи телевизион ва радиои Тоҷикистонро ба хотир овард.
Хонандагони Мактаби таҳсилои миёнаи умумии № 26 ба номи Аминҷон Шукӯҳии ноҳияи Бобоҷон Ғафуров ва ғолибони Озмуни вилоятии «Шукӯҳихонӣ» аз ашъори устод намунаҳо қироат намуданд.
Дар байни баромадкунандагон ҳофизони хушсадо Носирҷон Раҳимов, Шарифмуҳаммад Ниёзов ва Абдукарим Аминов бо суруду таронаҳои дилнишину рӯҳнавоз ба маҳфил ҷилои дигар бахшиданд.
Дар фарҷом аз номи наздикону пайвандон ва аҳли оилаи Ҳоҷибоевҳо фарзанди устод Аминҷон Шукӯҳӣ, Каримҷон Ҳоҷибоев (Шукӯҳӣ), ки ҳамроҳи ҳамсараш
барои иштирок дар маҳфил аз шаҳри Вашингтони Амрико омада буд, сухан карда, ба ташкилкунандагони маҳфили адабӣ-фарҳангӣ «Таронасози муҳаббат» изҳори сипос намуд.
К. Ҳоҷибоев барои хотира аз ин маҳфил ба Китобхонаи илмӣ-оммавии ба номи Тошхоҷа Асирӣ чанд китоби хешро бо соядасташ тӯҳфа кард.
Ҳамин тавр, маҳфили адабӣ-фарҳангии «Таронасози муҳаббат» ба муносибати 95-солагии Шоири халқии Тоҷикистон Аминҷон Шукӯҳӣ муассир ва хотирмон гузашт.
Медиапортали «Тироз»
Нет комментариев