Ҳангоми интихоб кардани ноутбуки нав ҳатман ба нетбук ҳам рӯ меорем, чунки онҳо ба ҳамдигар хеле шабоҳат доранд (аз рӯи афту андом, инчунин аз рӯи характеристикаҳои асосиашон). Вале на ҳар кас медонад, ки онҳо аз ҳамдигар чӣ фарқ доранд, бинобар ин дар ин мақола ман хостам фарқияти байни ин таҷҳизотҳоро ба шумо баён созам. Инчунин хулосабарорӣ хохем кард, ки кадоме аз инҳо беҳтаранд.
- Вазифаи аввал. Фарқи аслии нетбук аз ноутбук – мақсаду вазифаи пешбишудаи он аст. Нетбук пеш аз ҳама барои истифодабарии мобилӣ (дастрас) пешбинӣ шудааст. Бале, аммо лэптопро низ чунин истифода бурдан мумкин аст, масалан дар нақлиёт ё ин ки дар қаҳвахона, вале он беҳад калонҳаҷм аст ва наметавон гуфт, ки он барои чунин истифодабарӣ қулай аст. Ногуфта намонад, ки ноутбук қодир аст, ки ба пуррагӣ вазифаҳои компютери фардиро иҷро кунад, аммо нетбук аз ӯҳдаи ин кор намебарояд ва ба ҳайси пуркунандаи он хизмат мекунаду бас. Бинобар ин ҳангоми интихоби нетбук дар назар дошта бошед, ки чаро маҳз онро харидорӣ мекунед.
- Андозаи девайс (габаритҳо, экран, сафҳакалид (клавиартура), вазн ва ғайра). Фикр дорем, ба ҳамагон маълум аст, ки фарқияти асосии онҳо – андоза аст. Габарити нетбукҳо аслан хурд мешавад. Экрани онҳо ҳамагӣ 10 дюймро ташкил медиҳад (дар баъзе мавридҳо 12), вале андозаи ноутбукҳо метавонад то ба 18 дюйм расад, яъне экрани онҳо ба монитори аслӣ баробаранд. Клавиатураашон низ ба клавиатураи оддӣ шабоҳат дошта, истифодабариаш ҳам куллай аст, вале клавиатураи нетбук на он қадар калон буда, тугмачаҳояш бисер хурд аст ва тарзи ҷойгиршавиашон ба ҳам зичанд, бинобар ин, ҳуруфчинии матн дар он хеле нороҳат аст. Дар вазн нетбук бешубҳа бартарӣ дорад, чунки он бисёр сабук буда, ҷойи зиёдеро намегирад (дохили ҷуздон бемалол ҷой мегирад).
- Андозаи диски сахт. Дар фарқияти техникӣ дар мадди аввал андозаи диски сахт меистад. Дар ноутбук он метавонад ба 4 терабайт расад, дар ҳоле, ки барои нетбук ҳатто ёфтани 700 гигабайт кори саҳлу осон нест. Диски сахти калон аслан барои нафароне, ки филмҳову сериалҳо, бозиҳову дискографияҳои сарояндаҳои маъруфро дар он нигоҳ медоранд, зарур аст. Дар акси ҳол барои кор ё хониш диски сахти начандон калон (андозааш то 200 гигабайт) кофист.
- Тавоноии пардозанда (протсессор). Аз рӯи қонуну қоида дар нетбукҳо протсессорҳои тавоноиашон пурқудратро насб намекунанд, чунки дар онҳо дарҳол вазифаҳои бисёр мураккабро иҷро кардан номумкин аст, ба ғайр аз ин шах шудану ях кардани доимии компютер шуморо метавонад дилгиру ноором кунад ва бо ин кори шуморо ба тахир гузорад. Вале дар ноутбукҳо моделҳои навини ин гуна протсессорҳоро дидан мумкин аст, ки ҳатто аз протсессорҳои баъзе аз компютерҳои фардӣ дида пурқудрадтаранд.
- Видеокорт. Агар шумо компютерро пеш аз ҳама барои бозӣ харидорӣ карданӣ бошед, пас мо бояд ба шумо саросемавор ин хабарро расонем, ки нетбукҳо беҳад сифати пасти контроллери графикӣ доранд (ба қиёс бо ноутбукҳои муосир). Бозӣ кардан албатта мумкин аст, вале суръати равиши бозӣ ва графикаи он ба шумо писанд нахоҳад омад. Бинобар ин, агар графикаи бозӣ барои шумо роли калонро бозад, пас ҳатман ба ноутбукҳои барои бозӣ пешбинишуда аҳамият диҳед, ногуфта намонад, ки онҳо хеле арзиши гарон доранд, вале дилро аз бозии нотакрор хушнуд хоҳанд кард.
6. Андозаи хотираи фаврӣ. Инҷо гап сари хотираи фаврии нетбукҳо меравад, аслан метавонад 1-2 гигабайт бошад, максиммум метавонад ба 4 – гигабайт расад (барои кор аслан кофист, бо дарназадошти дигар характеристикаҳои девайс). Вале агар шумо аз система ва дар маҷмӯъ аз таҷҳизот аз ин бештарро соҳиб шудан хоҳед, пас ҳатман ноутбукро интихоб кунед. Хотираи фаврии ноутбук метавонад ҳатто то ба 32 гигабайт расад.
7. Вақти корӣ. Боз як фарқияти нетбук аз ноутбук ин вақти кории он ба шумор меравад ё ба таври дигар гӯем, тавоноии аккумулятори таҷҳизот ба ҳисоб меравад. Аслан ноутбукҳо 2-3 соат ба таври мустақим кор мекунанд, нетбукҳо бошанд, метавонанд 5-6 соат кор кунанд, вале бо вуҷуди ин нархаш арзон мемонад. Ноутбукҳо низ метавонанд бе қуввамонии иловагӣ фурсати зиёд кор кунанд, аммо дар ин сурат нархи онҳо чандин карат боло меравад.
8.Приводи оптикӣ. Яке аз фарқияти чашмраси дигари нетбук, шояд шумо дарҳол пай бурдед – ин надоштани приводи оптикии он ба шумор меравад, яъне он наметавонад дисҳои CD ва DVD – ро сабт кунад ё ин ки онҳоро хонада тавонад. Барои бархе аз нафарон ин камбудӣ як даҳшатро пеши рӯ меорад, вале набояд чунин ҳисобид, чунки замони имрӯз ҳама кайҳо ба флешчаҳо ва дискҳои сахти берунӣ гузаштанд, ки дар онҳо метавонед ҳамаи маълумотҳои заруриатонро нигоҳ доред. Системаи оператсиониро низ тариқи флешча шинонидан (установка) мумкин аст. Вале бо вуҷуди ин агар ба ин ҳама нигоҳ накарда дар он кор карда натавонед, пас варианти ягонаи интихоб – ноутбук аст.
9.Нархи таҷҳизот. Фарқияти назарраси дигар ин нарху наво байни ин ду таҷҳизот аст. Нетбукро метавонед дар ҳаҷми аз 150 то 300 доллари ИМА харидорӣ кунед. Вале нархи ноутбук аз 200 доллар сар карда то 7000 доллари америкоӣ буда метавонад! Агар мақсадатон ҳарҷӣ камтар масрафкардани пул бошад, пас хубтар аст, ки нетбукро харидорӣ кунед, вале агар аз ӯҳдаи иҷрои вазифаҳои дар пешаш гузошташуда набарояд, пас ҳатман бояд ноутбук бихаред.
10.Системаи оператсионнии кӯтоҳкардашуда. Бинобар сабаби паст будани характеристикаи техникии нетбукҳо ба онҳо системаҳои оператсионии кӯтоҳкардашуда шинонида (установука) мешавад. Одатан онҳоро Netbook Edition ном мебаранд. Дар нетбук шинонидани OS Linux (дистрибутиви Ubuntu ё Mint) ба маврид аст, чунки он ду барои чунин корҳо бо ин гуна таҷҳизотҳо пешбинӣ шудаанд. Вале аз рӯи майлу хоҳиши худ метавонед системаи оператсионии Windows -ро низ шинонед, аммо суръати кори он бисёр суст хоҳад буд. Дар ноутбукҳо албатта ин гуна мушкилот дида намешавад ва шумо метавонед, дилхоҳ системаро дар он шинонед ва он ба таври лозима кор хоҳад кард.
Ана акнун ба саволи хотимавӣ расидем… агар рости гапро ҳамчун мутахассиси ин соҳа бигӯям, пас интихоби ман ноутбук аст, нигоҳ накарда ба нарху наво шумо дар ҳақиқат чизи лозимиатонро ба даст меоред. Дар сурати интихоб кардани нетбук, шумо доим аз норасоии имукониятҳои он нороҳатиро эҳсос хоҳед кард, ки он метавонад дар оянда ба хасташавии рӯҳи оварда расонад (аз интихобатон пушаймон хоҳед шуд). Ноутбукҳои хурд низ вуҷуд доранд, ҳам аз ҷиҳати андозаи экран ва ҳам аз ҷиҳати вазн. Бинобар ин, фарқият аллбатта дида мешавад, вале онро метавон бартараф кард.
Нетбук дорои танҳо як бартарӣ аст, ин ҳам бошад, нархи хеле арзони он. Бо ин даҳҳо ҳазорон нафарро мафтуни худ месозад ва то ба имрӯз ба он талабот ҳаст. Ҳатто планшетҳои компютерӣ (аз ширкати хуб ва бо сифати баланд) нисбатан пурарзиштаранд, вале ин ҷо ба “як тини пучак” метавон соҳиби компютер бо имконотҳои васеъи он шуд.
Инчунин нетбук метавонад ба нафароне мувофиқ ояд, ки дар ҷойҳои ҷамъиятӣ ва нақлиёт мехоҳанд доим ба имконотҳои компютерӣ дастрасии пурра дошта бошанд, вале бинобар сабаби хотирпарешониашон нетбукро ба осонӣ дар куҷое гузошта, фаромӯш месозанд. Аз ин ҷо бар меояд, ки барои чунин афрод харидорӣ кардани ноутбуки гаронбаҳо ва ё планшет маънӣ надорад.
Манбаъ: http://www.maktab.tj/
Нет комментариев