Раиси шаҳри Хуҷанд Маъруф Муҳаммадзода дар ҷамъомади тантанавӣ ба муносибати Рӯзи кормандони хоҷагии манзилию коммуналӣ эшонро бо иди касбиашон табрик намуда, бо сипосномаву тӯҳфаҳои хотиравӣ қадршиносӣ кард.
Раиси шаҳри Хуҷанд зимни табрикоти худ, гуфт, ки фаъолияти сарраёсати ободонӣ, хоҷагию манзилию коммуналии мақомоти иҷроияи ҳокимияти давлатии шаҳри Хуҷанд барои ободонию кабудизоркунӣ, чароғонкунию гулзоркунӣ, тозаю озода нигоҳ доштани ҳудуди шаҳр, нигоҳдории фонди манзил, аз он ҷумла биноҳои истиқоматӣ ва роҳҳои автомобилгарду пиёдагард ва амсоли ин нигаронида шудааст. Бояд зикр дошт, ки дар ин самт санаду қарорҳои дахлдор ва дастуру супоришҳои Асосгузори сулҳу ваҳдати миллӣ – Пешвои миллат, мӯҳтарам Эмомалӣ Раҳмон ва Раиси вилояти Суғд Раҷаббой Аҳмадзода ба тасвиб расида, он ба корҳои созандагӣ ва бунёдкорӣ вусъати тоза мебахшад.
Раиси шаҳр афзуд, ки дар қаламрави шаҳр давоми 5 моҳи соли ҷорӣ зиёда аз 400 ҳазор адад гулҳои ҳархелаи ороишӣ ва 4 ҳазору 839 адад дарахтони ҳамешасабз ва сояафкан шинонида шудааст. Ҳамчунин, тибқи дастуру супоришҳои Раиси вилоят Раҷаббой Аҳмадзода мумфаршкунии кӯчаҳои дохилии шаҳр идома ёфта, то имрӯз 5,5 км роҳҳо мумфарш карда шудаанд. Қайд кардан ба маврид аст, ки имрӯзҳо дар радифи таъмиру азнавсозӣ ва мумфаршкунии роҳҳои асосӣ ва дохили шаҳр, гулзоркунии кӯчаву хиёбонҳо, гулгаштҳо, шафати роҳҳои назди бино ва ташкилоту корхонаҳо давом дорад, ки дар он саҳми кормандони соҳаи манзилию коммуналӣ басо калон аст. Маҳз бо шарофати хизматҳои назарраси кормандони соҳа шаҳри азизамон рӯз ба рӯз ободу зебо гардида, дар қатори яке аз шаҳрҳои беҳтарин маҳсуб ёфтааст.
Маъруф Муҳаммадзода дар анҷоми табрикоти худ, изҳори боварӣ намуд, ки кормандони соҳа баҳри сазовор пешвоз гирифтани ҷашни 30- солагии Истиқлолияти давлатии Ҷумҳурии Тоҷикистон дар якҷоягӣ бо дигар сохторҳои дахлдори Мақомоти иҷроияи ҳокимияти давлатии шаҳри Хуҷанд корҳои бунёдкориву созандагӣ ва ободониро вусъат бахшида, баҳри амалӣ шудани қарори Раиси вилоят мўҳтарам Раҷаббой Аҳмадзода бобати 1300 рӯзи меҳнати зарбдор талош хоҳанд кард.
Сипас ба як қатор фаъолони соҳа Сипоснома ва тӯҳфаҳои хотиравии Мақомоти иҷроияи ҳокимияти давлати шаҳр тақдим карда шуд. Аз ҷониби Шӯрои Иттифоқҳои касабаи вилоят низ кормнадони фаъол бо тӯҳфаҳо ва ба фарзандони онҳо роҳхат баҳри истироҳат дар истироҳатгоҳи “20 солагии Истиқлолият” супорида шуд.
Манбаъ: Дафтари матбуоти Раиси шаҳри Хуҷанд
Нет комментариев